COP27- Կլիմայական ճգնաժամի կորուստներն ու վնասները փոխհատուցելու հիմնադրամ
Մարիամ Երեմեան - Վատիկան
Եգիպտոսի Շարմ Էլ-Շեյխ քաղաքի մէջ կայացած ՄԱԿ-ի կլիմայական ճգնաժամին հայող COP27 լիագումար գագաթաժողովը, որուն մասնակցեցան 62 հազար ներկայացուցիչներ՝ աշխարհի 198 երկիրներէ, իր աշխատանքները աւարտեց շաբաթ օրը՝ 19 նոյեմբերին, «Կլիմայի փոփոխութեան կորուստներն ու վնասները փոխհատուցելու հիմնադրամ» մը ստեղծելու որոշումով։
Մինչև յաջորդ 2023-ի COP28-ը՝ «անցումային յանձնաժողովը» պիտի աշխատի Հիմնադրամի գործառնական մեկնարկի ծրագիրը պատրաստելու ուղղութեամբ:
Աջակցութիւն խոցելի երկիրներուն
COP27-ի ամփոփիչ փաստաթուղթը նախատեսեց ի միջի այլոց ստեղծել նախնական ահազանգի համակարգ մը՝ օժանդակելու աշխարհի բոլոր՝ և յատկապէս առաւել խոցելի, երկիրներուն՝ եղանակային ծայրայեղ իրադարձութիւններուն դիմակայելու նպատակով, և կլիմայական ճգնաժամի դէմ պայքարին մէջ ճանչցաւ երիտասարդներու, կանանց և բնիկ համայնքներու հիմնարար դերը:
Հաստատուեցաւ նաև մոլորակի ընդհանուր ջերմաստիճանի բարձրացումը 1.5 աստիճան սահմանափակելու վերաբերեալ նախորդ՝ Կլազկոյի COP26-ի ընթացքին ընդունած որոշումը՝ պարտաւորուելով ջերմային գազերու արտանետումներու 43 տոկոս կրճատում մինչև 2030 թուական՝ 2019-ի համեմատ:
Ափսոսանք հանածոյ վառելիքի վերաբերեալ պարտաւորութիւններու բացակայութեան առնչութեամբ
Գագաթաժողովի ընթացքին ընդգծուեցաւ վերականգնուող ուժանիւթի աղբիւրներուն անցումը արագացնելու կարևորութիւնը և յոյս յայտնուեցաւ հնարաւորինս արագ կերպով կրճատել ածուխով աշխատող ելեկտրական ուժանիւթի արտադրութիւնը։
Վերջնական փաստաթուղթի մէջ, սակայն, բացակայեցան հանածոյ վառելիքի վերաբերեալ պարտաւորութիւնները՝ առաջացնելով շատ առաջնորդներու և երկիրներու ափսոսանքը:
Ֆրանչիսկոս Պապի կոչերը
Յիշեցնենք, որ Ֆրանչիսկոս Սրբազան Քահանայապետը հանդէս եկաւ զօրաւոր կոչերով՝ յորդորելով լուծել կլիմայի փոփոխութեան խնդիրը՝ մտածելով երիտասարդ սերունդներու ապագայի մասին:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
