Եւրոպական Միութեան ուժանիւթի նախարարները համաձայնած են Ռուսական կազը վերցնել միացեալ գնումներու համաձայնագիրներէն
Եւրոպական Միութեան երկիրներու ուժանիւթի նախարարները համաձայնած են ռուսական կազը վերցնել միացեալ գնումներու համաձայնագիրներէն, որոնց ծաւալը 2023 թուականին պէտք է կազմէր առնուազն 13,5 միլիառ խորանարդ: ՌԲԿ կը հաղորդէ, որ այս մասին նշուած է Եւրոպական յանձնաժողովի յայտարարութեան մէջ:
«Նոր կանոնները համաշխարհային շուկաներու մէջ կազ գնելու կարելիութիւն պիտի ստեղծեն Եւրոպական Միութեան անդամ երկիրներու եւ ուժանիւթի ընկերութիւններու համար: Անդամ երկիրները ընդգծած են, որ ռուսական կազը վերցուի միացեալ գնումներու համաձայնագիրներէն», նշուած է փաստաթուղթին մէջ:
Նախարարները համաձայնութիւն գոյացուցած են շարք մը հարցերու մէջ, որոնց շարքին.
– Ուժանիւթի ոլորտին մէջ կանոնակարգող մարմիններու համագործակցութեան գործակալութեան կողմէ մինչեւ մարտի վերջ հեղուկացուած կազի վերաբերեալ Եւրոպական Միութեան նոր արժեչափ ստեղծելու մասին:
– Կազի ցերեկային գիներու սահմանափակման մեքանիզմի կիրարկման մասին` ըստ «Թի.Թի.ԷՖ.»-ի,
– Եւրոպական Միութեան ուժանիւթային համերաշխութեան ամրապնդման մասին, որպէսզի «համոզուին, որ արտակարգ կացութեան պարագային ոչ մէկ պետութիւն մինակ պիտի մնայ»,
– Այն ճարտարագիտութիւններու թոյլատրման ընթացակարգի արագացման մասին, «որոնք կրնան փոխել կացութիւնը արդէն այս ձմրան, օրինակ` արեւային ֆոթոելեկտրական համակարգերու եւ ջերմային մղիչներու սարքի»:
«Ես չեմ կրնար գերագնահատել, թէ որքան կարեւոր են այս միջոցները ներկայ ճգնաժամին արձագանգելու համար, եւ ես ուրախ պիտի ըլլայի, որ բանակցութիւններուն մէջ համաձայնութիւն ձեռք բերուէր: Չափազանց կարեւոր է յառաջ ընթանալ եւ որքան կարելի է արագ իրականացնել այս թղթածրարը, եւ ես յոյս ունիմ, որ խորհուրդը յառաջիկայ շաբաթներուն թղթածրարը պաշտօնապէս պիտի ընդունի», ըսած է Եւրոպական Միութեան ուժանիւթի հարցով յանձնակատար Քատրի Սիմսոն:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
