Եւրոպական Միութիւնը Ազրպէյճանին կոչ կ՛ուղղէ` անյապաղ հետաքննելու Հայ պատերազմական գերիներու գնդակահարութեան տեսանիւթը

Եւրոպական Միութիւնը Ազրպէյճանի իշխանութիւններուն կոչ կ՛ուղղէ անյապաղ հետաքննելու տարածուած տեսանիւթը, որուն մէջ ազրպէյճանցի զինուորները հայկական մարտական դիրքի մէջ դաժանաբար կը գնդակահարեն արդէն իսկ գերի յանձնուած հայ զինուորները: «Արմէնփրես» կը հաղորդէ, որ Պրիւքսելի մէջ մամլոյ ասուլիսի ընթացքին այս մասին յայտարարած է Եւրոպական Միութեան արտաքին քաղաքականութեան ծառայութեան ներկայացուցիչ Փիթըր Սթանօ:

«Մենք կոչ կ՛ուղղենք` համապատասխան մարմիններու կողմէ անյապաղ հետաքննութիւն կատարելու: Այն տեսանիւթը, որ ցոյց կու տայ, թէ ինչպէ՛ս ազրպէյճանցի զինուորները մահապատիժի կ՛ենթարկեն հայ զինուորները, պէտք է հետաքննուի Ազրպէյճանի իշխանութիւններուն կողմէ», ըսած է ան:

Սթանոյի համաձայն, եթէ հետաքննութեան արդիւնքները ապացուցեն տեսանիւթին իսկութիւնը, ապա ասիկա զինուորական յանցագործութիւն է եւ միջազգային օրէնքի ակնյայտ խախտում:

«Նման յանցագործութիւնը պէտք է դատապարտուի», աւելցուցած է ան:

2 հոկտեմբերին ազրպէյճանական թելեկրամեան ալիքներու վրայ հրապարակուեցաւ տեսանիւթ մը, որուն մէջ կ՛երեւէր, թէ ազրպէյճանցի զինուորները ինչպէ՛ս հայկական մարտական յենակէտի մէջ դաժանաբար կը գնդակահարեն արդէն իսկ գերի յանձնուած հայ զինուորները:

Հարաւային Կովկասի մէջ Եւրոպական Միութեան յատուկ ներկայացուցիչ Թոյվօ Քլաար յայտարարած էր, որ եթէ տեսանիւթի իսկութիւնը հաստատուի, ապա ատիկա զինուորական յանցագործութիւն է, որ պէտք է հետաքննուի:

Հայաստանի Հանրապետութեան մարդու իրաւունքներու պաշտպան Քրիստինէ Գրիգորեան յայտարարած է, որ Ազրպէյճանի բանակին կողմէ հայ պատերազմական գերիներու սպանութիւնը տեղի ունեցած է 13 սեպտեմբերին` Հայաստանի Հանրապետութեան դէմ Ազրպէյճանի լայնածաւալ յարձակումի ընթացքին:

Լուրը՝ Ազդակէն