Կառավարութիւնը կը նկատուի հրաժարած, իսկ խորհրդարանը կը գտնուի իր Նախագահը ընտրելու ժամկէտին մէջ

Մինչ ամերիկեան տոլարին սակը կը սաւառնի եւ անոր դիմաց լիբանանեան դրամանիշը աւելի եւս կ՛արժեզրկուի, երկրին գործադիր իշխանութիւնը արդէն իսկ մուտք կը գործէ ընթացիկ աշխատանքները կատարելու իր դերակատարութեան մէջ:

Շաբաթ գիշեր նախագահական պալատը հրապարակեց հաղորդագրութիւն մը, որ կը նշէ, թէ նոր խորհրդարանի ընտրութեամբ, կառավարութիւնը հրաժարած կը նկատուի եւ կը գործէ իբրեւ ընթացիկ հարցերու կառավարութիւն:

Նախագահ Աուն շնորհակալութիւն յայտնեց վարչապետին ու նախարարներուն եւ անոնցմէ պահանջեց պաշտօնակատարի իրենց դերակատարութիւնը կատարել, մինչեւ նոր կառավարութեան նշանակումը:

Մինչ այդ նորընտիր խորհրդարանի նստաշրջանը սկսաւ երէկ` կիրակի, 22 մայիս 2022-ին, իսկ խորհրդարանը այս թուականէն սկսեալ 15 օրուան ժամանակ ունի` ընտրելու խորհրդարանի նախագահը:

Նշենք, որ խորհրդարանի նախագահի ընտրութիւնը կրնայ ըլլալ առաջին մարտահրաւէրը, որ երկիրը պիտի դիմագրաւէ` նկատի ունենալով, որ խորհրդարանը կազմող երեսփոխանական պլոքներուն միջեւ այս իմաստով կայ տարակարծութիւն:

Սկսելու համար տարակարծութիւն կայ, որովհետեւ խորհրդարանի նախագահի թեկնածուն Նեպիհ Պըրրին է` խորհրդարանի ներկայ նախագահը. անոր թեկնածութիւնը պաշտօնապէս առաջադրուեցաւ Ազատագրում եւ բարգաւաճում երեսփոխանական պլոքին կողմէ:

Պլոքը մաղթեց, որ բոլորը զօրակցին Պըրրիի թեկնածութեան եւ աշխատին անոր հետ:

Մինչդեռ Լիբանանեան ուժեր կուսակցութեան նախագահած Հզօր հանրապետութիւն համախմբումն ու փոփոխութեան ներկայացուցիչները նկատուող նորընտիր երեսփոխանները կտրականապէս մերժեցին Պըրրիի թեկնածութիւնը:

Իր կարգին, Թրիփոլիի երեսփոխան Աշրաֆ Ռիֆի, որ այցելած էր Լիբանանեան ուժեր կուսակցութեան ղեկավար Սամիր Ժահժահի, հաստատեց, որ իրենք կտրականապէս կը մերժեն զօրակցիլ նախկին իշխանութեան համակարգը ներկայացնող անձնաւորութեան մը: «Մենք կը զօրակցինք փոփոխութիւնն ու գերիշխանութիւնը ներկայացնող ուժի թեկնածուին, ո՛վ որ ալ ըլլայ ան», հաստատեց Ռիֆի:

Ժահժահ նշեց, որ Պըրրին չեն կրնար ընտրել, որովհետեւ ան հակառակորդ քաղաքական ուժերը կը ներկայացնէ` աւելցնելով, որ իրենք կը փափաքին տեսնել խորհրդարանի մեծամասնութիւնը ներկայացնող աշխուժ եւ գործունեայ կառավարութիւն մը:

Աղբիւրը՝ Ազդակ