«ՕԹԱՆ-ը այս շաբաթ պիտի պատասխանէ անվտանգութեան վերաբերեալ Ռուսական առաջարկներուն» կ՛ըսէ Սթոլթենպերկ
ՕԹԱՆ-ի ընդհանուր քարտուղար Ենս Սթոլթենպերկ յայտարարած է, որ դաշինքը այս շաբաթ գրաւոր պատասխան պիտի ուղարկէ անվտանգութեան երաշխիքներու վերաբերեալ ռուսական առաջարկներուն` համակարգելով Միացեալ Նահանգներուն հետ: Այս մասին հաղորդեց «ՌԻԱ Նովոսթի» լրատու գործակալութիւնը` յղում կատարելով Սթոլթենպերկի «Սի.Էն.Էն.»-ի հետ հարցազրոյցին:
«Մենք կ՛աւարտենք ՕԹԱՆ-ին ուղարկուած առաջարկներու գրաւոր փաստաթուղթը, որ մենք այս շաբաթավերջին պիտի ուղարկենք: Մենք ատիկա պիտի ընենք Միացեալ Նահանգներուն հետ միասին», ըսած է Սթոլթենպերկ:
Յիշեցնենք, որ Ռուսիոյ արտաքին գործոց նախարարութիւնը 17 դեկտեմբերին շրջանառութեան մէջ դրած էր Միացեալ Նահանգներու եւ ՕԹԱՆ-ի կողմէ իրաւական անվտանգութեան երաշխիքներու տրամադրման վերաբերեալ ռուսական երկու փաստաթուղթերու նախագիծ:
Նախքան այդ, Ռուսիոյ նախագահ Վլատիմիր Փութին ՕԹԱՆ-ին կոչ ուղղած էր` Ռուսիոյ անվտանգութեան յուսալի եւ երկարաժամկէտ երաշխիքներ ապահովելու համար առարկայական բանակցութիւններու սկսելու: Ան բացատրած էր, որ Մոսկուային իրաւական երաշխիքներ պէտք են, որովհետեւ արեւմտեան գործընկերները չեն կատարած իրենց համապատասխան բանաւոր պարտաւորութիւնները:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ