Շուշիի կերպարուեստի թանգարանի պուրակի քանդակները հեռացուած են

Ատրպէյճանի զինուած ուժերուն կողմէ Շուշիի բռնագրաւումէն ետք, Շուշիի Կերպարուեստի թանգարանի Քանդակներու պուրակին մէջ գտնուող ցուցանմուշները հեռացուած են, կ՛ահազանգէ Կովկասեան ժառանգութեան պաշտպանութեան (Caucasus Heritage Watch) կազմակերպութիւնը:

Կազմակերպութիւնը հրապարակած է 10 Ապրիլին եւ 5 Յունիսին առնուած արբանեակային լուսանկարները, որոնցմէ կարելի է հետեւցնել, որ ի տարբերութիւն առաջին պատկերին, երկրորդին մէջ 51 քանդակները «կը բացակային» Շուշիի Կրպարուեստի թանգարանի պուրակէն:

«Կովկասեան ժառանգութեան պաշտպանութեան կազմակերպութիւնը մտահոգ է թանգարանի սեփականութիւնը հանդիսացող արուեստի այս գործերուն վիճակով: Կովկասեան ժառանգութեան պաշտպանութեան կազմակերպութիւնը կոչ կ՛ընէ Ատրպէյճանի իշխանութիւններուն, որ յայտնեն գրաւուած քանդակներուն վայրը», կ՛ըսուի կազմակերպութեան յայտարարութեան մէջ:

Քաղուած «Ասպարէզ»էն