Ռիքըր վերահաստատեց Հայաստանի սահմանէն Ազրպէյճանի զինուած ուժերը հեռացնելու Ամերիկեան դիրքորոշումը
Միացեալ Նահանգներու արտաքին գործոց նախարարի Եւրոպայի եւ Եւրասիոյ հարցերով օգնականի պաշտօնակատար Ֆիլիփ Ռիքըր պաշտօնական այցելութեամբ կը գտնուի Հայաստան:
Ան Հայաստանի արտաքին գործոց նախարարութեան մէջ տեղի ունեցած հանդիպումի մը ընթացքին քննարկեց երկկողմանի հետաքրքրութիւն ներկայացնող հարցեր:
Ֆիլիփ Ռիքըր հաստատեց, որ Միացեալ Նահանգները պատրաստ են ամրապնդելու գործընկերութիւնը Հայաստանի հետ` հիմնուելով ընդհանուր ժողովրդավարական արժէքներուն վրայ:
Ռիքըր վերահաստատեց, որ Միացեալ Նահանգները` իբրեւ Մինսքի խմբակի համանախագահ, պատրաստ են իրենց մասնակցութիւնը բերելու Լեռնային Ղարաբաղի տագնապի խաղաղ բանակցային լուծման հարցին մէջ եւ շարունակելու պահանջել հայ ռազմագերիներու ու գերեվարուածներու վերադարձը:
Ամերիկեան կողմը ընդգծեց Հայաստանի եւ Ազրպէյճանի սահմանին տիրող իրավիճակի լարուածութեան թուլացման անհրաժեշտութիւնը` վերահաստատելով Միացեալ Նահանգներու արտաքին գործոց նախարարութեան 27 մայիսի յայտարարութեամբ ամրագրուած դիրքորոշումը, որուն համաձայն, Ազրպէյճանի զինուած ուժերը պէտք է ետ քաշուին 11 մայիսի դրութեամբ տեղակայուած դիրքեր:
Հայաստանի մէջ Միացեալ Նահանգներու դեսպանութիւնը տեղեկացուց, որ Ֆիլիփ Ռիքըր այցելեց Ծիծեռնակաբերդի յուշահամալիր, ուր յարգանքի տուրք մատուցեց Հայոց ցեղասպանութեան զոհերու յիշատակին` Միացեալ Նահանգներու ժողովուրդին անունով ծաղկեպսակ զետեղելով անմար կրակին շուրջ:
Քաղուած «Ազդակ» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ