«Այսօր մենք կանգնած ենք բարոյականութեան ու արժանապատուութեան Սարդարապատի շեմին». Արմէն Սարգսեան

Հայաստանի նախագահ Արմէն Սարգսեան հետեւեալ ուղերձը յղեց` Հայաստանի անկախութէան տօնին առիթով.

«Այսօր Հայաստանի առաջին հանրապետութեան հռչակման 103-րդ տարեդարձն է:

Առաջին հանրապետութիւնը նշանակալից իրադարձութիւն էր մեր ժողովրդի կեանքում` անկախ պետականութեան վերականգնում ինքնիշխանութեան համար երկարամեայ պայքարից յետոյ: Այն եւս մէկ անգամ ցոյց տուեց, որ երբ միասնական ենք, կարողանո՛ւմ ենք յաղթել:

Հայաստանի առաջին հանրապետութիւնը ստեղծուեց այնպիսի պայմաններում, երբ վտանգուած էին մեր ինքնութիւնն ու ֆիզիքական գոյութիւնը, վտանգ, որ կանխուեց Սարդարապատի, Բաշ Ապարանի եւ Ղարաքիլիսայի հերոսամարտերի արդիւնքում` մեր միասնութեան ու անձնազոհութեան շնորհիւ:

Այսօր մենք կանգնած ենք բարոյականութեան ու արժանապատուութեան Սարդարապատի շեմին, ճակատամարտ, որի միայն յաղթակա՛ն արդիւնքը կարող է երաշխաւորել ամուր պետականութիւն եւ զարգացման հեռանկար:

Այսօր կարիք ունենք սթափ դատողութեան ու առողջ մտածողութեան, կարիք ունենք պատմութեան դասը սերտելով` նորովի գիտակցելու,

որ հայրենիքը որպէս իրականութիւն կարող է ապրել միայն անկախ պետականութեան տեսքով,

որ անկախ պետականութիւնը ձեռք է բերւում եւ պաշտպանւում դժուարութեամբ,

որ շատ ժողովուրդներ այսօր էլ երազում են դրա մասին:

Անկախ պետականութիւնը մեր ինքնութեան ու ազգային շահի գիտակցումն է, յանուն որի ի զէն էր ելել մեր ժողովուրդը` բանակն ու աշխարհազօրն աւելի քան 100 տարի առաջ: Դրա կարիքը կայ բոլոր ժամանակներում` ինչպէս Հայաստանի առաջին հանրապետութեան օրօք էր, այնպէս էլ այսօրուայ Հայաստանի հանրապետութեան ժամանակ, եւ դրա կարիքը կը լինի նաեւ վաղուայ Հայաստանի Հանրապետութիւնում:

Անկախ պետականութիւնը մեր սահմանների անձեռնմխելիութիւնն է ու անսակարկելիութիւնը, որոշում կայացնելու եւ այն իրագործելու մեր կարողութիւնը, անվտանգութիւն ապահովելու եւ խաղաղութիւն թելադրելու մեր ունակութիւնը:

Մենք պէտք է կարողանանք ոչ միայն յաղթել, այլեւ խորութեամբ հասկանալ, թէ ինչպէս վարուել այդ յաղթանակի հետ:

Պէտք է կարողանանք յաղթանակը լցնել մնայուն բովանդակութեամբ ու վերածել յաջողութիւնների:

Պէտք է կարողանանք խորութեամբ հասկանալ եւ ընկալել` ինչ է տեղի ունեցել երէկ, ինչ է տեղի ունենում այսօր եւ արձագանգել ու գործել համարժէք:

Պէտք է կարողանանք կանխատեսել եւ կառավարել այն, ինչ կարող է լինել վաղը:

Պէտք է կարողանանք սթափ վերլուծել մեր անյաջողութիւնների պատճառները, այդ թւում` Առաջին հանրապետութիւնից ցայսօր, եւ աշխատել սեփական սխալներն ուղղելու վրայ, մշակել յստակ տեսլական եւ զարգացման ծրագրեր:

Ես հաւատում եմ, որ կարո՛ղ ենք հասնել այնպիսի ձեռքբերումների, որոնք դեռ երէկ անհնարին էին թւում, կարո՛ղ ենք իրականութիւնը համապատասխանեցնել մեր ցանկութեանը, կարո՛ղ ենք կեանքի կոչել այն երազանքը, որն առաջին հայեացքից թւում է անհասանելի:

Թէ ինչպիսին կը լինի մեր հայրենիքը` Հայաստանն ու Արցախը, կախուած է մեզնից, իւրաքանչիւրիցս: Իսկ հայրենիքը կը լինի այնպիսին, ինչպիսին այն կը դարձնենք միասին:

Կեցցէ՛ Հայաստանի Հանրապետութիւնը:

Կեցցէ՛ Արցախը:

Կեցցէ՛ մեր ժողովուրդը»:

Քաղուած «Ազդակ» էն