Իսրայէլեան ոստիկանութիւնը բիրտ ուժի կը դիմէ. հարիւրաւոր պաղեստինցիներ կը վիրաւորուին բռնագրաւեալ արեւելեան Երուսաղէմի մէջ
Բռնագրաւեալ Արեւելեան Երուսաղէմի մէջ հարիւրաւոր պաղեստինցիներ վնասուած են իսրայէլեան ոստիկանութեան հետ բախումներու պատճառով:
Բախումները սկսած են 10 մայիսի առաւօտեան: Իսրայէլեան ոստիկանութիւնը արցունքաբեր կազ օգտագործած է պաղեստինցիները ետ մղելու Աքսա մզկիթի տարածքէն, եւ կրակած է ձգախեժէ փամփուշտներով:
Պաղեստինեան Կարմիր մահիկի կազմակերպութեան տուեալներով` ոստիկանութիւնը դաժանօրէն վարուած է հաւաքուած իսլամ հաւատացեալներուն նկատմամբ, որոնք Աքսա մզկիթին մէջ հաւաքուած էին ռամատանեան ընթացիկ աղօթքները կատարելու:
Երուսաղէմի Աքսա մզկիթի տնօրէն Օմար Քեսուանին աջակցութեան համար դիմած է իսլամական աշխարհին` յայտնելով. «Իսլամական աշխարհը կը յորդորենք օգնել Աքսա մզկիթին` հրեայ վերաբնակիչներու եւ իսրայէլացի ոստիկաններու կողմէ մզկիթին վրայ յարձակելէ ետք»:
Պաղեստինի կրօնի գործերու նախարարութեան աղբիւրը մամուլին հաղորդած է, որ Իսրայէլի ոստիկանութիւնը գրաւած է Աքսա մզկիթի բոլոր բանալիները:
Կազայի հատուածէն եօթը հրթիռներու արձակման պատճառով Երուսաղէմի եւ Պէյթ Շեմսի մէջ գործի դրուած է օդային տագնապի ազդանշանը:
Իսրայէլի բանակի լրատուական ծառայութենէն յայտնած են, որ հրթիռներէն մէկը որսացած է «Երկաթեայ գմբէթ» հակահրթիռային համակարգը:
Պաղեստինեան «Համաս» խմբաւորման զինուորական թեւի ներկայացուցիչ Ապու Օպայտա աւելի կանուխ յայտարարած էր, որ Իսրայէլը մինչեւ ժամը 18:00-ը ժամանակ ունի զօրքերը դուրս բերելու բռնագրաւեալ Արեւելեան Երուսաղէմի Աքսա մզկիթի եւ Շէյխ Ժարրահ թաղամասի շրջաններէն:
Քաղուած «Ազդակ»էն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ