Եւրոպական խորհուրդը` Հայաստանի իշխանութեան եւ քաղաքացիական հասարակութեան տրամադրութեան տակ
Եւրոպական խորհուրդի ընդհանուր քարտուղար Մարիա Փէյչինովիչ Պուրիչ մեկնաբանած է Հայաստանի մէջ տեղի ունեցող իրադարձութիւնները եւ կողմերուն զսպուածութեան կոչ ուղղած:
«Ես ուշադրութեամբ կը հետեւիմ Եւրոպական խորհուրդի անդամ Հայաստանի մէջ տեղի ունեցող վերջին իրադարձութիւններուն եւ հանդարտութեան, զսպուածութեան եւ պատասխանատուութեան կոչ կ’ուղղեմ: Բոլոր քաղաքական տարակարծութիւնները պէտք է քննարկուին եւ լուծուին խաղաղ ճամբով` քաղաքացիական հասարակութեան ներկայացուցիչներու մասնակցութեամբ, բանակցութիւններու սեղանին շուրջ եւ ժողովրդավարութեան ու օրէնքի գերակայութեան սկզբունքներուն համապատասխան», ըսուած է Պուրիչի յայտարարութեան մէջ, որ հրապարակուած է Եւրոպական խորհուրդի կայքին վրայ:
Եւրոպական խորհուրդի ընդհանուր քարտուղարը նշած է. «Ստեղծուած կացութեան մէջ օգնութիւն ցուցաբերելու համար Եւրոպական խորհուրդը կը մնայ Հայաստանի իշխանութիւններուն եւ քաղաքացիական հասարակութեան տրամադրութեան տակ»:
Քաղուած «Ազդակ»էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
