Մարսէյի «Սուրբ Սահակ եւ Սուրբ Մեսրոպ» մշակոյթի կեդրոնը յարձակումի ենթարկուեցաւ
ԵՐԵՒԱՆ, «Արմէնփրէս».- 24 Յունուարի երեկոյեան ժամը 6:40ին, անյայտ անձեր կրակ բացին Մարսէյի «Սուրբ Սահակ եւ Սուրբ Մեսրոպ» մշակոյթի կեդրոնին ուղղութեամբ:
«Հայերն Այսօր»ի հետ ունեցած զրոյցի մը ընթացքին ,Աբովեան վարժարանի նախագահԿարէն Խուրշուտեան ըսաւ, թէ անիկա հայկական ամէնէն խորհրդանշական կեդրոններէն մէկն է: Սրահին մէջ շաբաթական դրութեամբ կ՛ուսանին առաւել քան 250 մանուկներ: «Անհանգստութիւնս անսահման է: Վստահ եմ, որ Ֆրանսայի կառավարութիւնը պիտի երաշխաւորէ, որ հետագային կարելի ըլլայ անվտանգ գործունէութիւն տանիլ: Մենք անկոտրում ենք», հաստատեց Խուրշուտեան:
Յարձակումէն ետք ոստիկանութիւնը հասաւ եւ հետազօտեց դէպքին վայրը: Կրակոցէն կոտրած է երկրորդ յարկի պատուհանը, ուր դաշնակի դասեր կը տրուէին: Տուժողներ չկան:
Նշենք, որ, մշակոյթի կեդրոնի նախագահը ոստիկանութեան դէպքին վերաբերեալ բողոք ներկայացուց:
Սոյն մշակոյթի կեդրոնը հայկական կազմակերպութիւններու համակարգման կեդրոնատեղին է: Արցախեան պատերազմին ընթացքին այնտեղ կը պատրաստուէր Մարսէյէն եւ Ֆրանսայի հարաւէն Հայաստան ուղարկուող մարդասիրական օգնութիւնը:
Մինչ այդ նման դէպքեր տեղի ունեցած էին Պերլինի, Սան Ֆրանսիսքոյի, Փարիզի եւ Տեսինի մէջ, երբ վանտալիզմի ենթարկուեցան Կոմիտասի արձանը եւ Ցեղասպանութեան յուշահամալիրը: Այս գործողութիւններուն մէջ ներգրաւուած էր «Գորշ գայլեր» թրքական ծայրայեղ ազգայնական խմբաւորումը, որ Ֆրանսայի մէջ լուծարուեցաւ:
Քաղուած «Ասպարէզ»էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
