Որոնել

Vatican News
Ռուսիոյ նախագահ Վլատիմիր Փութին Ռուսիոյ նախագահ Վլատիմիր Փութին   (ANSA)

«Լեռնային Ղարաբաղի կարգավիճակը տակաւին չէ որոշուած. Անիկա պիտի յստակացուի ապագային». Փութին

Մենք պայմանաւորուած ենք, որ պիտի պահպանենք սթաթուս-քոն (ներկայ իրավիճակը), իսկ ինչ կ՛ըլլայ ապագային՝ պէտք է որոշել:
Ունկնդրէ լուրը

ԵՐԵՒԱՆ, «Արմէնփրէս».- Երեքշաբթի, 17  Նոյեմբերին, ռուսական «Ռոսիա 24» պատկերասփիւռի կայանէն ելոյթ ունենալով Ռուսիոյ նախագահ Վլատիմիր Փութին յայտարարեց, որ Լեռնային Ղարաբաղի կարգավիճակի հարցը տակաւին չէ որոշուած:

«Մենք պայմանաւորուած ենք, որ պիտի պահպանենք սթաթուս-քոն (ներկայ իրավիճակը), իսկ ինչ կ՛ըլլայ ապագային՝ պէտք է որոշել: Կը կարծեմ, որ եթէ բարենպաստ պայմաններ ստեղծուին՝ վերականգնին յարաբերութիւնները Հայաստանի եւ Ատրպէյճանի միջեւ, ինչպէս՝ ժողովուրդներուն միջեւ կենցաղային մակարդակի վրայ, անոնք նաեւ կը ստեղծեն պայմաններ որոշելու Լեռնային Ղարաբաղի կարգավիճակը: Ինչ կը վերաբերի Ղարաբաղը` իբրեւ անկախ, ինքնուրոյն պետութիւն ճանչնալ-չճանչնալուն, այդ մէկը  կարելի է տարբեր ձեւով գնահատել, սակայն անիկա, անկասկած, զգալի հանգամանք էր, որովհետեւ Ղարաբաղի չճանչցուած ըլլալ, նաեւ՝ Հայաստանի կողմէ, զգալի հետք կը ձգէր իրադարձութիւններու ընթացքին եւ անոնց ընկալման վրայ: Այստեղ անհրաժեշտ է ուղղակի ըսել, որ ժամանակին, նախկին վրացական ղեկավարութեան, անկասկած, յանցաւոր գործողութիւններէն ետք, նկատի ունիմ Հարաւային Օսէթիոյ մեր խաղաղապահները հարուածելը, Ռուսիա ճանչցաւ Հարաւային Օսէթիոյ եւ Աբխազիոյ անկախութիւնը: Մենք ճանչցանք  նաեւ, որ Ղրիմի մէջ բնակող ժողովուրդի կամքի արտայայտութիւնը ու այնտեղ բնակող մարդոց՝ Ռուսիոյ հետ վերամիաւորուելու ձգտումը արդար է, մենք ընդառաջ գացինք մարդոց. մենք այդ բանը ըրինք բաց կերպով: Այդ քայլը կրնայ ինչ որ մէկուն հաճելի թուիլ, ուրիշի մը՝ ոչ, բայց մենք այդ քայլը առինք ելլելով այնտեղ բնակող մարդոց շահերէն եւ Ռուսիոյ շահերէն, եւ մենք չենք ամչնար այդ մասին խօսելու: Ղարաբաղի նկատմամբ նոյնը չկատարուեցաւ, եւ այդ, անշուշտ, զգալի ազդեցութիւն ձգեց այնտեղ տեղի ունեցող իրադարձութիւններուն վրայ», յայտնեց Փութին:

Քաղուած «Ասպարէզ» էն

18/11/2020, 07:49