Փութին եւ Էրտողան մանրամասնօրէն քննարկած են Լեռնային Ղարաբաղի տագնապի գօտիին մէջ տիրող կացութիւնը
Ռուսիոյ նախագահ Վլատիմիր Փութին եւ Թուրքիոյ նախագահ Ռեճեփ Թայիփ Էրտողան ունեցած են հեռաձայնային հաղորդակցութիւն մը, որուն ընթացքին քննարկած են Լեռնային Ղարաբաղի մէջ տիրող իրավիճակը: Այս մասին կը հաղորդէ Քրեմլինի մամլոյ ծառայութիւնը:
«Մանրամասնօրէն քննարկուած է ղարաբաղեան տագնապի գօտիին մէջ տիրող կացութիւնը: Ռուսիոյ նախագահը իր թուրք պաշտօնակիցին տեղեկացուցած է Ազրպէյճանի եւ Հայաստանի ղեկավարներուն հետ շարք մը հեռաձայնային հաղորդակցութիւններու մասին: Այդ հաղորդակցութիւնները ուղղուած են մարտական գործողութիւնները շուտափոյթ դադրեցնելու տարբերակներ գտնելուն եւ քաղաքական-դիւանագիտական լուծումին հասնելուն: Հաստատուած է տագնապի խաղաղ լուծման հասնելու նպատակով փոխադարձ համագործակցութեան պատրաստակամութիւնը», կը նշուի Քրեմլինի հաղորդագրութեան մէջ:
Իր կարգին, ԹԱՍՍ լրատու գործակալութիւնը, վկայակոչելով Թուրքիոյ արտաքին գործոց նախարարութենէն իր աղբիւրը, հաղորդեց, որ Ռուսիոյ եւ Թուրքիոյ արտաքին գործոց նախարարներ Սերկէյ Լաւրով եւ Մեւլութ Չաւուշօղլու հեռաձայնային հաղորդակցութիւն ունեցած են:
«Մեր նախարարը բանակցութիւններ վարած է Ռուսիոյ արտաքին գործոց նախարար Սերկէյ Լաւրովի հետ, քննարկուած է Լեռնային Ղարաբաղի նիւթը», նշած է ԹԱՍՍ-ի զրուցակիցը:
Քաղուած «Ազդակ»էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ