Ռուսիան կոչ կ՝ընէ հակամարտութեան գօտիէն անյապաղ դուրս հանել վարձկաններն ու ահաբեկիչները
Ռուսիոյ Դաշնութեան Արտաքին գործերու նախարարութիւնը կոչ կ՝ընէ արցախա-ազրպէյճանական հակամարտ զօրքերու սահմանագիծէն եւ հակամարտութեան գօտիէն անյապաղ դուրս հանել վարձկաններն ու ահաբեկիչները: Այս մասին նշուած է ՌԴ ԱԳՆ տարածած մեկնաբանութեան մէջ։
«Ըստ տեղեկութիւններուն՝ Լեռնային Ղարաբաղի հակամարտութեան գօտի կ՝իրականացուի անօրինական զինուած խմբաւորումներու, մասնաւորապէս՝ Սուրիայէն, Լիպիայէն զինեալներու տեղափոխումը՝ մարտական գործողութիւններուն անմիջական մասնակցելու նպատակով:
Խորապէս մտահոգուած ենք այս գործընթացներով, որոնք ոչ միայն կը յանգեցնեն հակամարտութեան գօտիին վրայ լարուածութեան ալ աւելի մեծնալուն, այլեւ երկարաժամկէտ սպառնալիք կը ստեղծեն տարածաշրջանի բոլոր երկիրներու անվտանգութեան համար:
Կոչ կ՝ընենք շահագրգիռ պետութիւններու ղեկավարներուն` գործուն միջոցներ ձեռնարկելու հակամարտութեան մէջ օտարերկրեայ ահաբեկիչներու եւ վարձկաններու օգտագործումը չարտօնելու եւ տարածաշրջանէն անոնց անյապաղ դուրս հանելու ուղղութեամբ»,- ըսուած է հաղորդագրութեան մէջ:
Քաղուած «Ազդակ» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
