Վեներայի մթնոլորտին մէջ կեանքի հաւանական նշաններ յայտնաբերուած են
Գիտնականները Վեներայի մթնոլորտին մէջ յայտնաբերած են հազուագիւտ քիմիական նիւթ մը, որ կրնայ վկայել մոլորակի մակերեւոյթին կենդանի մանր գոյացութիւններու գոյութեան մասին. այս մասին կը հաղորդէ «Պի.Պի.Սի.»-ի ռուսական ծառայութիւնը` նշելով, որ նման վերտառութեամբ յօդուածը լոյս տեսած է «Նէյչըր Ասթրոնոմի» ամսագիրին մէջ:
Յայտնաբերուած նիւթը ֆոսֆին է, որ անգոյն թունաւոր կազ մըն է, որ չափազանց հազուադէպ գոյութիւն ունի բնական պայմաններու մէջ: Երկրագունդի վրայ անիկա մեծ մասամբ կը ստանան արհեստական եղանակով` քիմիական գործողութեան հետեւանքով:
Բացի ատկէ, ֆոսֆին նաեւ կը յառաջանայ կայծակի հարուածէն եւ հրաբխային շարժումներու ժամանակ, սակայն միայն փոքր քանակութեամբ, իսկ Վեներայի մէջ յայտնաբերուած են այդ կազի զգալի պաշարներ: Ճիշդ այդ ալ գիտնականներուն արտօնած է յառաջ մղել զգայացունց վարկածը:
Խնդիրը այն է, որ բնական եղանակով ֆոսֆինը այդպիսի քանակներով կրնայ ստացուիլ թթուածինազուրկ միջավայրի մէջ ապրող մանրէներու կենսագործունէութեան շնորհիւ: Ըստ աստղագէտներու, բազմաթիւ բացատրութիւններէն ամէնէն հաւանականը այն է, որ կազը ունի կենսաբանական ծագում:
Կը յստակացուի, որ յայտնագործութիւնը կատարուած է հզօր աստղադիտակներու միջոցով:
Նոյն ատեն, փորձագէտները կը շեշտեն, թէ յայտնաբերուածը վկայութիւն է այն բանի, թէ Վեներայի` «Երկրի քոյր» մոլորակին վրայ կեանք կրնայ գոյութիւն ունենալ, սակայն չի բացառուիր նաեւ այն տարբերակը, որ յայտնաբերուած ֆոսֆինը ունի այլ` առայժմ անյայտ ծագում:
Վեներան կը պատկանի երկրային խումբի մոլորակներու դասին. անիկա քանի մը առումներով նման է Երկրագունդին: Մասնաւորաբար, Վեներան իր չափի, զանգուածի, Արեւի մերձակայութեան առումով նման է Երկրագունդին, սակայն այլ առումներով արմատապէս կը տարբերի մեր մոլորակէն: Բացի Վեներայէն, երկրային խումբի մոլորակներէն են նաեւ Հրատը եւ Փայլածուն:
Քաղուած «Ազդակ»էն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ