Յունաստանի մէջ հրդեհի պատճառով աւերուած ճամբարի գաղթականները կ՛ուզեն Եւրոպական Միութեան երկիրներ փոխադրուիլ եւ ոչ թէ այլ Ճամբար

Յունաստանի Լեսպոս կղզիին վրայ գտնուող «Քարա Թեփէ» ժամանակաւոր ճամբարին մօտ հարիւրաւոր գաղթականներ բողոքի ցոյց կատարած են` պահանջելով զիրենք փոխադրել Եւրոպական Միութեան անդամ երկիրներ: Այս մասին կը հաղորդէ ռուսական «քորրեսփոնտենթ» կայքը:

Աղբիւրը կը մանրամասնէ, որ բազմաթիւ գաղթականներ չեն ուզեր վերջերս տեղի ունեցած հրդեհին պատճառով գրեթէ ամբողջովին աւերուած «Մորիա» ճամբարէն այլ ճամբար տեղափոխուիլ եւ առհասարակ Լեսպոս կղզիին վրայ մնալ:

Գաղթականներու եւ տեղահանուածներու հարցերով նախարար Նոթիս Միթարաքիս յայտարարած է, որ նոր ճամբարը յառաջիկայ հինգ օրուան մէջ ամբողջովին պիտի բնակեցուի: Այս վայրը կրնայ 3000 մարդ հիւրընկալել, սակայն տակաւին 500 անձ ընդունած է:

Յիշեցնենք, որ 9-10 սեպտեմբերին երկու հրդեհի պատճառով գրեթէ ամբողջովին աւերուած էր Եւրոպական Միութեան մէջ մեծագոյնը նկատուող «Մորիա» ճամբարը: Ըստ ՄԱԿ-ի գաղթականներու հարցերով գերագոյն յանձնակատարին, հրդեհին պատճառով անօթեւան մնացած են շուրջ 11.500 անձեր, ներառեալ` 4000 երեխաներ, որոնք ստիպուած եղած են քանի մը օր բաց երկինքի տակ գիշերել:

Ճամբարը սկիզբէն նախատեսուած եղած է ընդամէնը 2800 բնակիչի համար, սակայն տարիներ շարունակ գերբնակեցուած եղած է: Տեղեկութիւններու համաձայն, հրդեհին նախորդած են գաղթականներու միջեւ տեղի ունեցած անկարգութիւններ, որոնք առնչուած եղած են նախորդ շաբաթ «Քորոնա» ժահրով վարակման առաջին դէպքէն ետք մեկուսացման դրութեան հաստատումին:

Քաղուած «Ազդակ» էն