Նաղդալեան. «Հայաստան կը մերժէ սպառնալիքի լեզուն եւ հանդէս կու գայ խնդիրի խաղաղ լուծման դիրքէն»
Հայաստան կը մերժէ սպառնալիքի լեզուն եւ հանդէս կու գայ խնդիրի խաղաղ լուծման դիրքէն: Այս մասին ըսած է Հայաստանի արտաքին գործոց նախարարութեան մամլոյ քարտուղար Աննա Նաղդալեան` «Ինթըրֆաքս»-ի խնդրանքով մեկնաբանելով Ազրպէյճանի ղեկավարութեան վերջին օրերուն կատարած յայտարարութիւնները խաղաղ հոլովոյթին վերաբերեալ:
«Ղարաբաղեան տագնապը ունի երեք կողմ, որոնք զինադադարի մասին համաձայնագիր ստորագրած են: Նախապէս Ազրպէյճան բանակցութիւններ կը վարէր ինչպէս Լեռնային Ղարաբաղի, այնպէս ալ Հայաստանի Հանրապետութեան հետ: Այնուհետեւ Ազրպէյճանը հրաժարեցաւ Լեռնային Ղարաբաղի հետ բանակցութիւններէ: Եթէ այժմ Ազրպէյճանը կը հրաժարի բանակցութիւններ վարելէ Հայաստանի հետ, ապա պարզ չէ, թէ որո՛ւն հետ այդ երկիրը պիտի խօսի ղարաբաղեան տագնապին շուրջ: Ազրպէյճանը մտադի՞ր է վերսկսելու բանակցութիւնները ղարաբաղեան կողմին հետ, թէ՞ ոչ: Մենք չենք գիտեր:
Վերջերս Ազրպէյճան տարբեր ձեւերով կը փորձէ պատերազմի սպառնալիքներով հանդէս գալ: Եթէ բանակցութիւններէն դուրս գալու սպառնալիքը այս շարքէն է, ապա ատիկա մեզ չի զարմացներ եւ չի տպաւորեր:
Հայաստան կը մերժէ սպառնալիքի լեզուն եւ հանդէս կու գայ խնդիրի խաղաղ լուծման դիրքերէն», շեշտած է Նաղդալեան:
Քաղուած «Ազդակ» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ