Գերմանիոյ, Զուիցերիոյ, Բրիտանիոյ եւ Նոր Զելանտայի մէջ ցոյցեր` «Սեւամորթներուն կեանքը կարեւոր է» կարգախօսով։
Ամերիկացի-ափրիկեցի Ճորճ Ֆլոյտի եւ Ռիչըրտ Պրուքսի ամերիկեան ոստիկանութեան կողմէ սպանութենէն ետք, եւրոպական տարբեր քաղաքներու մէջ սեւամորթներու նկատմամբ ցեղապաշտական մօտեցումներուն դէմ բողոքի ցոյցերը կը շարունակուին` Միացեալ Նահանգներու մէջ ցոյցերուն զուգահեռ:
Գերմանիոյ մէջ ձախակողմեան եւ ֆաշականութեան դէմ եղող տարբեր շարժումներու անդամ 150 ցուցարարներ Պերլինի մէջ մասնակցեցան «Սեւամորթներու կեանքը կարեւոր է» կարգախօսով ցոյցի մը` բարձրացնելով ոստիկանութեան բռնարարքները դատապարտող, ոստիկանութեան վայրագութիւնն ու ցեղային խտրականութիւնը դատապարտող պաստառներ:
Ցոյցին մասնակիցները պահանջեցին յարգել բոլորը եւ արդարութիւն կիրարկել բոլորին նկատմամբ, ինչպէս նաեւ ցեղապաշտութենէն հրաժարիլ:
Նոր Զելանտայի Օքլընտ եւ Ուելինկթըն քաղաքներուն փողոցները եւս ականատես դարձան հազարաւորներու մասնակցութեամբ նոյն կարգախօսով ցոյցերու:
Բրիտանիոյ մէջ ոստիկանութիւնը Լոնտոնի մէջ բուռն ցոյցերու ընթացքին ձերբակալեց աւելի քան հարիւր ցուցարարներ:
Զուիցերիոյ Ցիւրիխ քաղաքին մէջ աւելի քան տասը հազար ցուցարարներ մասնակցեցան քայլարշաւի մը, որուն ընթացքին ձախակողմեան ցուցարարներու փոքր խումբ մը քարկոծեց ոստիկանութիւնը:
Ցուցարարները կը բացագանչէին «Սեւամորթներուն կեանքը կարեւոր է», «Չկայ արդարութիւն…չկայ խաղաղութիւն» եւ «Տուէք անոր անունը` Ճորճ Ֆլոյտ»:
Քաղուած «Ազդակ»էն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ