Արցախի նախագահական եւ խորհրդարանական ընտրութիւններուն մասնակցեցաւ 76,471 քուէարկող։
Մարտ 31-ին, Արցախի մէջ տեղի ունեցան նախագահական եւ խորհրդարանական ընտրութիւններ, որոնք սկսան առաւօտեան ժամը 8:00-ին, երբ բացուեցան 282 ընտրական տեղամասերը, որոնցմէ մէկը կը գտնուէր Երեւանի մէջ` Հայաստանի Հանրապետութեան մէջ Արցախի Հանրապետութեան մնայուն ներկայացուցչութեան շէնքին մէջ, այլ տեղամաս մըն ալ հաստատուած էր Շուշիի քրէակատարողական հիմնարկին մէջ: Ժամը 20:00-ին փակուեցան ընտրական կեդրոնները:
Արցախի Հանրապետութեան Կեդրոնական ընտրական յանձնախումբին կողմէ տրամադրուած տուեալներուն համաձայն, Արցախի Հանրապետութեան ընտրողներուն թիւը կը կազմէ 105,251: Ընտրութիւններուն մասնակցած է 76,471 ընտրող (ընդհանուր թիւին 72,7 առ հարիւրը): Գործած են 8 ընտրական յանձնախումբեր` Ստեփանակերտի եւ Արցախի 7 շրջաններու մէջ:
Արցախի Հանրապետութեան նախագահի եւ Ազգային ժողովի համապետական ընտրութիւններուն դիտորդական առաքելութիւն իրականացնելու եւ ընտրութիւններուն ընթացքը լուսաբանելու համար Կեդրոնական ընտրական յանձնախումբին մօտ հաւատարմագրուած էր 963 դիտորդ եւ լրատուամիջոցներու 231 ներկայացուցիչ:
Արցախի նախագահական պաշտօնին համար կը պայքարէին 14 թեկնածուներ` Քրիստին Բալայեան, Վիթալի Բալասանեան, Սերկէյ Ամիրեան, Դաւիթ Բաբայեան, Բելա Լալայեան, Արայիկ Յարութիւնեան, Հայկ Խանումեան, Դաւիթ Իշխանեան, Վահան Բադասեան, Մասիս Մայիլեան, Աշոտ Ղուլեան, Ռուսլան Իսրայէլեան, Աշոտ Դադայեան եւ Մելսիկ Պօղոսեան:
Ազգային ժողովին համար ընտրութիւններուն կը մասնակցէին 12 քաղաքական ուժեր` Ազգային վերածնունդ կուսակցութիւն, Միասնական հայրենիք կուսակցութիւն, Անկախութեան սերունդ կուսակցութիւն, Հայ Յեղափոխական Դաշնակցութիւն, Արցախի յեղափոխական կուսակցութիւն, Ազատ Հայրենիք-ՔՄԴ կուսակցութիւններու դաշինք, Արցախի Արդարութիւն կուսակցութիւն, Արցախի ժողովրդավարական կուսակցութիւն, Միացեալ Հայաստան կուսակցութիւն, Արցախի պահպանողական կուսակցութիւն, Լեռնային Ղարաբաղի համայնավար կուսակցութիւն, Նոր Արցախ կուսակցութիւններու դաշինք:
Արցախի Հանրապետութեան Կեդրոնական ընտրական յանձնախումբի նախագահ Սրբուհի Արզումանեանի համաձայն, ընտրական տեղամասերուն մէջ սկսած էր քուէաթերթիկներու հաշուարկը: Նախնական արդիւնքները յայտնի պիտի ըլլան մինչեւ Ապրիլ 1-ի, երեկոյեան ժամը 8:00-ը:
Երէկ, կէս գիշերուան նախնական տուեալներուն համաձայն,
յառաջատար էր Արայիկ Յարութիւնեան:
Քաղուած Եռագոյնէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ