Ռայի Պատրիարք. «Լիբանան կը մերժէ Պաղեստինցի գաղթականներուն Եւ Սուրիացի տեղահանուածներուն բնակեցումը»
Մարոնի համայնքի Պշարա Ռայի պատրիարքը երէկ առաւօտեան մեկնեցաւ Հռոմ, ուր հանդիպում մը պիտի ունենայ Ֆրանչիսկոս պապին հետ` քննարկելու համար բնակեցման վերաբերող հարցեր, նկատի ունենալով, որ անիկա Լիբանանի սահմանադրութեան հիմնական կէտերէն մէկն է:
«Լիբանան կը մերժէ պաղեստինցի գաղթականներուն եւ սուրիացի տեղահանուածներուն բնակեցումը», հաստատեց Ռայի պատրիարքը` աւելցնելով, որ անոնք իրենց պատմութիւնն ու մշակոյթը ունեցող ժողովուրդներ են, եւ անոնց տունդարձի իրաւունքը յարգելի է:
Ռայի պատրիարքը հաստատեց, որ սահմանադրական հաստատութիւններուն եւ կառավարութեան նկատմամբ հոգատարութիւնը պէտք է անմիջական ըլլայ: «Սահմանադրական հաստատութիւններուն աշխատանքին մէջ արձանագրուելիք որեւէ խախտում լիբանանեան պետութեան անդամալուծութիւնն է», ըսաւ ան:
Ռայի պատրիարքը այս յայտարարութիւնները կատարեց Պէյրութի միջազգային օդակայանին մէջ` հանրապետութեան նախագահ զօր. Միշել Աունի ներկայացուցիչ` նախարար Նասիֆ Հըթթիի, Պուլոս Մաթար եպիսկոպոսին, օդակայանի ապահովութեան պատասխանատու գնդապետ Ժորժ Տումեթի, Լեռնալիբանանի գաղտնի սպասարկութեան պատասխանատու գնդապետ Քլիմոն Սաատի եւ Էլիաս Սֆէյրի ներկայութեան:
Ռայի պատրիարքը յայտնեց, որ կառավարութեան վստահութեան քուէ շնորհելու քայլը կախեալ պէտք է ըլլայ անոր մշակած աշխատանքային ծրագիրէն:
Միւս կողմէ, Ռայի պատրիարքը Հռոմ հասնելէ ետք նախագահեց խաղաղութեան Ս. պատարագին` մաղթելով, որ Լիբանանի քաղաքական դասը կարենայ փրկել երկիրը:
Ան խստիւ դատապարտեց օր մը առաջ Մաամըլթէյնի մէջ տեղի ունեցած պատահարը` ընդգծելով լիբանանեան ազգային միասնականութիւնը պահպանելու կարեւորութիւնը:
Ան կոչ ուղղեց աղօթելու Լիբանանի փրկութեան համար, ինչպէս նաեւ Լիբանանի մէջ քաղաքական, տնտեսական եւ ելեւմտական կայունութեան հաստատումին համար:
Ռայի պատրիարքը ընդգծեց, որ Լիբանան պատգամ երկրի դերակատարութիւն ունի եւ իբրեւ այդպիսին, եթէ ան չկարենայ իր ոտքերուն վրայ դարձեալ կանգնիլ, ապա ոչ մէկ երկիր պատրաստ պիտի ըլլայ օժանդակելու Լիբանանին:
Քաղուած Ազդակէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ