«Գալուստ Կիւլպէնկեան» Հիմնարկութեան Հայկական Բաժանմունքը Կը Յայտարարէ երեք նոր ծրագիրներ
Յատուկ հաղորդագրութեամբ մը «Գալուստ Կիւլպէնկեան» հիմնարկութիւնը Լիբանանին ուղղուած իր ռազմավարութեան ծիրին մէջ մշակած է կրթական համակարգին վերաբերող երեք նոր ծրագիրներ: Առաջին ծրագիրը «Հայկական դպրոցներու նպաստի ծրագիր»-ն է, որ բաց է Լիբանանի բոլոր հայկական դպրոցներուն: Անոր հիմնական նպատակն է օժանդակել դպրոցներուն, որպէսզի կարենան իրենց մանկավարժական համակարգը բարեփոխել` շեշտը դնելով արեւմտահայերէնի որակեալ ուսուցումին վրայ:
Երկրորդ ծրագիրը «Ուսուցիչներու շարունակական ուսումնառութեան ծրագիր»-ն է, որ ուղղուած է արեւմտահայերէնով այլազան նիւթեր դասաւանդող բոլոր ուսուցիչներուն: Հիմնարկութիւնը կը փափաքի կենսական բարեփոխումներու մղիչ ուժ մը ըլլալ` ուսուցիչներու վերաբերող ներդրումներ ընելով:
Երրորդ ծրագիրը «Հայերէնի օժանդակ դասընթացքի ծրագիր»-ն է, որուն հիմնական նպատակն է բարելաւել մասնակցողներուն լեզուամտածողութիւնը:
«Գալուստ Կիւլպէնկեան» հիմնարկութիւնը պիտի համագործակցի տեղական, ինչպէս նաեւ միջազգային մասնագէտներու հետ` հիմնական նպատակ ունենալով մասնակցողներուն լեզուական, մշակութային, վերլուծողական եւ քննական մտածողութեան հմտութիւններու զարգացումը` արեւմտահայերէնով:
Յաւելեալ տեղեկութիւններ կարելի է ստանալ կայքէջէն` https://gulbenkian.pt/armenian-communities/:
Քաղուած Ազդակէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ