Պերլինի եւ Թիրանայի մէջ ԹՈՒՄՕ կեդրոններ պիտի բացուին:

ԵՐԵՒԱՆ, «Եռագոյն».- 21 Յունուարին, ԹՈՒՄՕ Երեւանի եւ KFW դրամատան Պերլինի կեդրոնին մէջ զուգահեռաբար տեղի ունեցաւ Պերլինի մէջ ԹՈՒՄՕ կեդրոնի հիմնադրութեան պայմանագիրի ստորագրման արարողութիւնը: Կեդրոնը պիտի գործէ Պերլինի արեւմտեան հատուածին՝ պատմական Շարլոթենպուրկ թաղամասին մէջ: Անոր բացումը նախատեսուած է այս տարուան Հոկտեմբերին: Արդի արհեստագիտութեան նուիրուած կեդրոնին մէջ, անվճար անդամակցելու հնարաւորութիւն պիտի ունենան 1200 ուսանողներ:

Արարողութեան ներկայ էին Հայաստանի եւ Գերմանիոյ կառավարութիւններու անդամներ, երկու երկիրներուն մօտ հաւատարմագրուած դեսպաններ, միջազգային կազմակերպութիւններու ներկայացուցիչներ, ինչպէս նաեւ ԹՈՒՄՕ կեդրոնի եւ KFW դրամատան ղեկավարներ:

Միւս կողմէ, «Պլումպըրկ» լրատու գործակալութիւնը հաղորդեց, թէ Ալպանիոյ բռնատէր Էնվեր Հոճային ի պատիւ կառուցուած համալիրը պիտի վերածուի կրթական եւ արուեստի կեդրոնի մը, որուն մօտաւորապէս կէսը պիտի դառնայ ԹՈՒՄՕի 7րդ մասնաճիւղը։

Ծրագիրին հովանաւորութիւնը ստանձնած են Ալպանիոյ կառավարութիւնը եւ Ալպանիաամերիկեան զարգացման հիմնարկութիւնը։