Vatican News
MEXICO-HUMAN RIGHTS-VIVANCO MEXICO-HUMAN RIGHTS-VIVANCO  (AFP or licensors)

HUMAN RIGHTS WATCH-ն Ու ՄԱԿ-ը Հայաստանի մասին զեկոյցներ հրապարակած են:

Զեկոյցին մէջ բաւական ծաւալուն անդրադարձ կայ նաեւ ընտանեկան բռնութեան դէպքերուն եւ իրաւապահ համակարգի այս ոլորտին մէջ գործունէութեան

Human rights watch իրաւապաշտպան կազմակերպութեան համաշխարհային զեկոյցին մէջ աշխարհի մօտ 100 երկիրներու, որոնց շարքին Հայաստանի մասին վերլուծութիւններ կան։

Իրաւապաշտպան կազմակերպութիւնը ընդհանուր անդրադառնալով 2018 -ի խորհրդարանական ընտրութիւններուն եւ կառավարութեան բարեփոխումներու օրակարգին, փտածութեան դէմ պայքարին ու արդարադատութեան, այնուհետեւ առանձին ոլորտներու մէջ կ՛անդրադառնայ հարցերու քննարկման: Մասնաւորապէս, անդրադառնալով բողոքի ցոյցերու ժամանակ ոստիկանութեան կողմէ ուժի կիրառելու հարցերուն` կազմակերպութիւնը կ՛արձանագրէ․

«Իշխանութիւնները վերսկան 2008-ին ցուցարարներու եւ անվտանգութեան ուժերու միջեւ տեղի ունեցած մահաբեր բախումներու հետաքննութիւնը, եւ 2019-ի Յունիսին մեղադրանք առաջադրեցին բարձրաստիճան պաշտօնեային` ցոյցը ցրելու ժամանակ ցուցարարի սպանութեան համար: Այնուամենայնիւ, 2016 եւ 2015 թուականներուն խաղաղ ցուցարարներու եւ լրագրողներու նկատմամբ ոստիկանութեան կողմէ անհամաչափ ուժի կիրառման երկու դէպքի քննութիւնը կը մնայ կասեցուած»,- գրուած է զեկոյցին մէջ:

Human rights watch կ՛անդրադառնայ նաեւ իրաւապահ ուժերու եւ ցուցարարներու միջեւ 2019 -ին տեղի ունեցած միջադէպերուն, որոնք կապուած են Ամուլսարի ոսկիի հանքի շինարարութեան դէմ կազմակերպուած բողոքի ցոյցերուն հետ:

«Ամուլսարի ոսկիի հանքավայրի շինարարութիւնը վերսկսելու դէմ կազմակերպուած բնապահպանական բողոքի ցոյցերը վերածուեցան ոստիկանութեան եւ ցուցարարներու միջեւ բախումներու, երբ անվտանգութեան աշխատակիցները արգիլեցին ցուցարարներուն հաւաք ունենալ խորհրդարանին մօտ գտնուող հասարակական այգիին մէջ: Ոստիկանութիւնը կարճ ժամանակով ձերբակալեց վեց ցուցարարներ` ոստիկաններու պահանջքին չենթարկուելու համար: Նոյն հարցին շուրջ բողոքի ցոյցերը շարունակուեցան Ջերմուկի մօտ, ուր տեղի բնակիչները եւ բնապահպանական աքթիւիստները փակած էին հանքավայր տանող ճանապարհները` ընդդիմանալով անոր կառուցման բնապահպանական եւ տնտեսական նկատառումներով»,:

Զեկոյցին մէջ բաւական ծաւալուն անդրադարձ կայ նաեւ ընտանեկան բռնութեան դէպքերուն եւ իրաւապահ համակարգի այս ոլորտին մէջ գործունէութեան:

«Ըստ պաշտօնական տուեալներու` 2019 թուականի առաջին կէսին իշխանութիւնները հետաքննութիւն կատարեցին ընտանեկան բռնութեան 331 քրէական դէպքով, որոնց շարքին` նոր յարուցուած 176 գործով: Մեղադրանք առաջադրուեցաւ 209 գործով, 45 գործ ուղարկուեցաւ դատարան: Սակայն շատ դէպքերու պարագային իշխանութիւնները չեն պաշտպաներ ընտանեկան բռնութեան զոհ դարձած կիներն եւ երեխաները` վտանգելով անոնց կեանքը եւ բարեկեցութիւնը»,- ըսուած է զեկոյցին մէջ:

Human rights watch-ի համաշխարհային զեկոյցին զուգահեռ` հրապարակուած է նաեւ ՄԱԿ-ի «Գաղթականութեան համաշխարհային զեկոյց»-ը: Ըստ որուն` Հայաստանը կը յիշատակուի տարուան ընթացքին բնակչութեան եւ արտագաղթող մարդոց թուային յարաբերակցութեամբ բացասական ցուցանիշներ արձանագրած 20 երկիրներու շարքին: Այդ ցոյցակին մէջ Հայաստանը 18-րդն է:

Քաղուած Եռագոյնէն

16/01/2020, 08:29