Ռուսիա կը ցաւակցի Սուրիոյ մէջ հայ հոգեւորականին սպանութեան
Ռուսիոյ արտաքին գործոց նախարարութեան պաշտօնական ներկայացուցիչ Մարիա Զախարովա շաբաթական ճեպազրոյցին ընթացքին ցաւակցութիւն յայտնեց Գամիշլիի հայ հոգեւորական Յովսէփ քհնյ. Պետոյեանի եւ անոր հօր` Աբրահամ Պետոյեանի սպանութեան առիթով:
«Մենք անկեղծ ցաւակցութիւն կը յայտնենք զոհուածներու հարազատներուն եւ Սուրիոյ հայ համայնքին», «Ռուսարմինֆօ» կայքին համաձայն, ըսած է Զախարովա` անդրադառնալով Սուրիոյ հիւսիսը հաստատուած զինադադարին եւ անկէ ետք ստեղծուած իրավիճակին:
Ան նշած է, որ Սուրիոյ կառավարութեան վերահսկողութեան տակ չգտնուող տարածքներուն մէջ քրիստոնեաներուն նկատմամբ բռնութեան եւ ահաբեկչութեան գործողութիւնները վրդովմունք կը յառաջացնեն:
Քաղուած «Ազդակ» էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
