Vatican News
«ԱՎՐՈՐԱ» Մարդասիրական նախաձեռնութիւնն ստացել է Հռոմի Պապի յատուկ օրհնութիւնը։ «ԱՎՐՈՐԱ» Մարդասիրական նախաձեռնութիւնն ստացել է Հռոմի Պապի յատուկ օրհնութիւնը։   (Vatican Media)

«ԱՎՐՈՐԱ» Մարդասիրական նախաձեռնութիւնն ստացել է Հռոմի Պապի յատուկ օրհնութիւնը։

Մեզ համար մեծ պատիւ է ստանալ Նորին Սրբութեան յատուկ օրհնութիւնը:

Չորեքշաբթի 2 հոկտեմբեր 2019-ին  «Ավրորա» մարդասիրական նախաձեռնութեան պատուիրակութիւնն արժանացել է Հռոմի Պապ Նորին Սրբութիւն Ֆրանցիսկոսի յատուկ օրհնութեանը Վատիկան կատարած այցի ընթացքում: Սա պատուիրակութեան՝ Հռոմ կատարած ծաւալուն այցի մի մասն է, որի ընթացքում կայացել են մի շարք հանդիպումներ Վատիկանի եւ համայնքի առաջնորդների հետ:

Վատիկան կատարած այցին ներկայ էին «Ավրորա» ֆորումի համահիմնադիրներ Նուբար Աֆեյանն ու Ռուբեն Վարդանյանը, ինչպէս նաեւ «Ավրորա» համաշխարհային ամէնամեայ մարդասիրական մրցանակի երեք դափնեկիրները՝ Թոմ Քաթինան, Մարգարիտ Բարանկիցեն եւ Չո Լա Աունը: Պատուիրակութիւնը հանդիպում ունեցաւ նաեւ Սուրբ Աթոռի պետքարտուղար Նորին Գերազանցութիւն կարդինալ Պիետրո Պարոլինիի հետ:  

Հռոմի Ֆրանցիսկոս Պապի հետ հանդիպման ժամանակ «Ավրորա» մարդասիրական նախաձեռնութեան ներկայացուցիչները խնդրեցին Նորին Սրբութեան օրհնութիւնը: Նախաձեռնութիւնը շարունակում է ջանքեր գործադրել աշխարհի տարբեր անկիւններում ամենախոցելի եւ ծայրայեղ կարիքի մէջ գտնուող համայնքներում աղքատութիւնը կրճատելու, առողջապահութիւնը բարելաւելու եւ կրթութիւն ապահովելու ուղղութեամբ: Պատուիրակութիւնը ներկայացրել է նաեւ #AraratChallenge շարժումը, որի նպատակն է ոգեշնչել մարդկանց՝ ներկայացնելու երախտագիտութեան սեփական պատմութիւնը, կատարելով նուիրատուութիւն եւ մաս կազմելով մարդասիրական շարժման:  

«Մեզ համար մեծ պատիւ է ստանալ Նորին Սրբութեան յատուկ օրհնութիւնը: Առաջնորդուելով «Երախտագիտութիւնն՝ ի գործ» գաղափարը տարածելու եւ դրա ազդեցութիւնն առաւելագոյնի հասցնելու յանձնառութեամբ՝ կարեւոր է, որպէսզի մենք սերտ յարաբերութիւններ կառուցենք հոգեւոր, կառավարական, մասնաւոր հատուածների եւ մշակոյթի ականաւոր դէմքերի հետ աշխարհի տարբեր անկիւններում: Այսօր Վատիկանում կայացած հանդիպումը մեզ թոյլ է տալիս ընդգծել «Ավրորա» նախաձեռնութեան կարեւորագոյն գործունութիւնն ու անհրաժեշտութիւնն աւելի մեծ աջակցութեան, քանի որ մենք ընդլայնում ենք մեր ջանքերը երկարաժամկէտ նպատակներով»,- ասաց «Ավրորա» մարդասիրական նախաձեռնութեան համահիմնադիր Նուբար Աֆեյանը:

«Հռոմի Պապ Նորին Սրբութիւն Ֆրանցիսկոսի եւ Նորին Գերազանցութիւն կարդինալ Պիետրո Պարոլինիի հետ հանդիպումները լաւ առիթ էին՝ ամփոփելու արածը եւ վերագնահատելու «Ավրորա» մարդասիրական նախաձեռնութեան գործունութիւնն ու  համաշխարհային ազդեցութիւնը: Այնուամենայնիւ, մեր գործը դեռ նոր է սկսուել: Այս ամիս Երեւանում սպասուող առաջին «Ավրորա» ֆորումին մենք կքննարկենք համաշխարհային մարտահրաւէրները՝ փորձելով գտնել լուծումներ»,- նշեց «Ավրորա» մարդասիրական նախաձեռնութեան համահիմնադիր Ռուբեն Վարդանյանը:

«Ավրորա» մարդասիրական նախաձեռնութիւնը՝ ստեղծուած Հայոց ցեղասպանութիւնը վերապրողների անունից եւ ի երախտագիտութիւն նրանց փրկողների, ձգտում է հնարաւորութիւն տալ մերօրեայ հերոսներին՝ կեանք եւ յոյս պարգեւել նրանց, ովքեր մարդասիրական աջակցութեան խիստ կարիք ունեն աշխարհի ցանկացած անկիւնում, այսպիսով՝ շարունակել մարդասիրութեան շղթան աշխարհով մէկ։

Անդրադառնալով հանդիպմանը՝ «Ավրորա» մարդասիրական նախաձեռնութեան նախագահ եւ 2017թ․ «Ավրորա» մրցանակի դափնեկիր Թոմ Քաթինան աւելացրել է․ «2017-ին միանալով «Ավրորայի» համայնքին՝ ինձ համար պատիւ է անձամբ հետեւել այն անհաւանական աշխատանքին, որն անում է մեր նախաձեռնութիւնն ամբողջ աշխարհում: Որպէս կաթոլիկ միսիոներ՝ մեծ պատիւ էր այս այցի շրջանակում հանդիպել Նորին Սրբութիւն Հռոմի Ֆրանցիսկոս Պապին: Աննկարագրելի յուզուած եմ: Միայն համաշխարհային մտքի առաջնորդների եւ փորձագէտների հետ համագործակցութեան, ինչպէս նաեւ  առաջնագծում աշխատող անհատների եւ կազմակերպութիւնների աջակցութեան շնորհիւ է հնարաւոր շարունակել մեր աշխատանքը երկարաժամկէտ ապագայում»։

Եւս երկու շաբաթ եւ հոկտեմբերի 14-21-ը Հայաստանում տեղի կունենայ առաջին «Ավրորա» ֆորումը։ Այն կմիաւորի աշխարհի սոցիալական, գիտական, տեխնոլոգիական, կրթական եւ մարդասիրական  ոլորտների լաւագոյն ներկայացուցիչներին: Ֆորումի ընթացքում նրանք կքննարկեն եւ կառաջարկեն համաշխարհային ամենահրատապ մարտահրաւէրները դիմագրաւելու նոր լուծումներ եւ հնարաւորութիւններ:

https://auroraprize.com/

 

03/10/2019, 08:46