Որոնել

Vatican News
Արմէն Սարգսեան  եւ  Գերապայծառ Տէր Լեւոն արքեպիսկոպոս Զեքիյեան : Արմէն Սարգսեան եւ Գերապայծառ Տէր Լեւոն արքեպիսկոպոս Զեքիյեան :  

ՀՀ նախագահը կոչ ըրած է անտարբեր չըլլալ Մխիթարեան միաբանութեան Մուրատեան վարժարանի ճակատագրին հանդէպ:

Արմէն Սարգսեան Փարիզի մէջ հանդիպած է Վենետիկի Մխիթարեան միաբանութեան քահանայապետական պատուիրակ, Գերապայծառ Տէր Լեւոն արքեպիսկոպոս Զեքիյեանի հետ:

Աշխատանքային այցով Ֆրանսա գտնուող Հայաստանի Հանրապետութեան նախագահ Արմէն Սարգսեան Փարիզի մէջ հանդիպած է Վենետիկի Մխիթարեան միաբանութեան քահանայապետական պատուիրակ, Գերապայծառ Տէր Լեւոն արքեպիսկոպոս Զեքիյեանի հետ: Անոնք խօսած են Մխիթարեան միաբանութեան գործունէութեան, այսօրուան դժուարութիւններուն եւ խնդիրներուն, մասնաւորապէս, Մուրատեան վարժարանի եւ մշակութային կեդրոնի ապագային վերաբերեալ։ Այս մասին կը տեղեկացնեն ՀՀ նախագահի աշխատակազմի հասարակայնութեան հետ կապերու վարչութենէն։ Հանդիպումէն ետք՝ Հանրապետութեան նախագահն ու Սրբազանը այցելած են Փարիզի մերձակայ արուարձան Սեւրի մէջ գտնուող Մխիթարեան միաբանութեան Սամուէլ Մուրատեան վարժարան եւ մշակութային կեդրոն։

Մեծ Փարիզի «Ոսկէ եռանկիւն»ի ճիշդ կեդրոնը գտնուող վարժարանին շէնքը, որ կը համարուի Սփիւռքի պատմութեան ամենախորհրդանշական հաստատութիւններէն մէկը, Մխիթարեաններու սեփականութիւնն է: Վարժարանը հիմնուած է 1834-ին Լուի-Ֆիլիփ թագաւորի հրամանով, ներկայ շէնքին մէջ սկսած է գործել 1928 թուականէն եւ կրթած է հայ պատանիներու եւ երիտասարդներու բազմաթիւ սերունդներ: Վերջին տարիներուն անիկա կանգնած է բազմաթիւ դժուարութիւններու առջեւ: Մխիթարեան միաբանութիւնը բաւարար միջոցներ չունի վերանորոգելու եւ իբրեւ մշակութային ու կրթական օճախ ծառայեցնելու ոչ բարուոք վիճակի մէջ գտնուող շէնքը: Միեւնոյն ժամանակ, հաշուի առնելով, որ անիկա ազգային հարստութիւն է, փորձ կը կատարուի գտնելու ճիշդ լուծումներ։

Նախագահ Սարգսեան շրջած է վարժարանի եւ մշակութային կեդրոնի տարածքին մէջ, ծանօթացած պայմաններուն: «Այսօր ինծի բախտ վիճակուած է գտնուելու մեր ժողովուրդի արժէքներէն մէկուն սրտին մէջ։ Կ՝ուզեմ դիմել մեր բոլոր հայրենակիցներուն` երբ կու գաք Ֆրանսա, Փարիզի մէջ կայ գեղեցիկ վայր մը` այս մանկավարժական կեդրոնը, որ երկու հարիւր տարիէն աւելի ծառայած է եւ կը  շարունակէ ծառայել հայ ժողովուրդին»,- ըսած է Արմէն Սարգսեան եւ ընդգծած, որ իբրեւ հայ մարդ, իրեն համար մեծ պատիւ է այդ վայրին մէջ գտնուիլը:

Քաղուած Եռագոյնէն

26/07/2019, 10:44