Նախագահ Սարգսեան. «Հայաստանը իսկապէս կրնայ դառնալ երկրագունդի ամէնէն պայծառ կէտերէն մէկը»
Հայաստանի Հանրապետութեան նախագահ Արմէն Սարգսեան Ամանորի առիթով շնորհաւորական ուղերձ յղած է Հայաստանի քաղաքացիներուն եւ աշխարհասփիւռ հայութեան:
Նախագահի ուղերձին մէջ նշուած է.
«Հայաստանի Հանրապետութեան յարգելի՛ քաղաքացիներ, աշխարհասփիւռ սիրելի՛ հայրենակիցներ, պատմութիւն դարձող 2018 թուականը մեծ փոփոխութիւնների, փորձութիւնների, սպասումների եւ յոյսերի տարի էր: Մենք ականատես եղանք մեր ժողովրդի լաւագոյն յատկանիշներին, միասնականութեանը, համախմբուածութեանը, բարձր բարոյական եւ քաղաքացիական ոգու դրսեւորումներին:
Շուտով ունենալու ենք նոր խորհրդարան եւ նոր կառավարութիւն, նրանց գործունէութեան յաջողութիւնը մեծապէս կախուած է լինելու Հայաստանի քաղաքացուց, քաղաքացու աջակցութիւնից եւ հասարակական, տնտեսական, քաղաքական, մշակութային կեանքին նրա մասնակցութիւնից: Հայաստանն իրօք կարող է դառնալ երկրագնդի ամենապայծառ կէտերից մէկը նորարարական գաղափարների կիրառման, մշակոյթի, տնտեսութեան, գիտութեան եւ այլ ոլորտներում, սակայն այդ ուղին հեշտ չի լինելու, կը լինեն նաեւ դժուարութիւններ` յաճախ պայմանաւորուած մեզնից անկախ գործօններով, այդ թւում` աշխարհաքաղաքական իրողութիւններով, եւ ես բոլորիս մաղթում եմ սթափութիւն, կազմակերպուածութիւն, առողջ դատողութիւն, պատասխանատուութիւն եւ ի հարկէ հանդուրժողականութիւն. սրանք են յաջողութեան հասնելու բանալիները:
Հայաստանի եւ Արցախի անվտանգութիւնը եւ ինքնիշխանութիւնը, Արցախի հիմնահարցի արդարացի լուծումը շարունակելու են գերակայ լինել մեր կեանքում, մենք ապրում ենք այն խորին գիտակցումով, որ անկախ մեր ծննդեան վայրից` ունենք մէկ հայրենիք, այդ հայրենիքը մենք պէտք է ծաղկեցնենք համատեղ ուժերով, Հայաստանի, Արցախի եւ սփիւռքի միասնական ջանքերով, մենք պէտք է հոգ տանենք ազգային ինքնութեան յենասիւների` մեր մշակոյթի, կրթութեան, հոգեւոր եւ ընտանեկան արժէքների մասին, այս գործում ի հարկէ առանցքային դեր է կատարում մեր սուրբ եկեղեցին, պէտք է աւելի հոգատար լինենք մեր պատմական եւ ազգային ժառանգութեան, մեր բնութեան, գիւղի, քաղաքի, եւ ընդհանրապէս մեր ողջ երկրի նկատմամբ:
Սիրելի՛ հայրենակիցներ, այս պահին հոգով եւ մտքով բոլորիդ հետ եմ, բոլորիդ կողքին, սահմանում կանգնած զինուորի եւ սպայի, շտապօգնութեան մեքենայում եւ հիւանդանոցում հերթապահող բժշկի, ծառայութիւն իրականացնող ոստիկանի, հրշէջի, հացթուխի, թաքսու վարորդի, գիւղացու եւ բանուորի, գիտնականի, արուեստագէտի, ձեր բոլորի հետ, յատկապէս մտահոգուած եմ դժուար ապրող ընտանիքների համար` նրանց, որ դեռ տուն չունեն, նրանց, որ ապրում են սահմանամերձ բնակավայրերում, մտահոգ եմ վիրաւորների, հիւանդների համար, մաղթում եմ հոգսերին թեթեւացում, թող գալիք տարում ձեզնից իւրաքանչիւրի առջեւ բացուեն յաջողութեան դռները, թող Հայաստանի իւրաքանչիւր քաղաքացի զգայ փոփոխութիւնների դրական շունչը:
Մեզ բոլորիս պէտք է առաջնորդի հետեւեալ շատ պարզ նշանաբանը` «կարողացել են ուրիշները, կարող ենք նաեւ մենք, չի կարողացել ոչ ոք աշխարհում, մենք կը լինենք առաջինը»:
Մեր հայրենիքին մաղթում եմ խաղաղութիւն, մեր ընտանիքներին առողջութիւն, յաջողութիւն, բարեկեցութիւն ու երջանկութիւն, մանուկներին` ծիծաղ ու խինդ, տարեցներին` արժանապատիւ հանգիստ, թող գալիք տարում ձեզնից իւրաքանչիւրը` ձեր հարազատները, ընտանիքները, Հայաստանի իւրաքանչիւր քաղաքացի, աշխարհի իւրաքանչիւր հայ կարողանայ երազել եւ իրականացնել իր երազանքը, իրականացնել մեր բոլորի երազանքները:
Շնորհաւոր Նոր տարի»:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
