Հայաստանի նախագահը հանդիպում ունեցած է Իտալիոյ նախագահին հետ
Աշխատանքային այցելութեամբ Իտալիա գտնուող Հայաստանի Հանրապետութեան նախագահ Արմէն Սարգսեան երէկ հանդիպում ունեցած է Իտալիոյ նախագահ Սերճիօ Մաթարելլայի հետ: Այս մասին կը տեղեկացնեն Հայաստանի Հանրապետութեան նախագահի աշխատակազմի հասարակութեան եւ տեղեկատուութեան միջոցներու հետ կապերու վարչութենէն:
Նախագահները քննարկած են հայ-իտալական կապերու սերտացման վերաբերող հարցեր:
Նշուած է, որ բարձր մակարդակով փոխադարձ այցելութիւնները էապէս կը նպաստեն երկկողմանի յարաբերութիւններու խորացման եւ նոր թափ կը հաղորդեն բարեկամ երկիրներուն միջեւ բոլոր ուղղութիւններով համագործակցութեան զարգացման:
Նախագահ Սարգսեան իր գործընկերոջ տեղեկացուցած է Իտալիա կատարած աշխատանքային այցելութեան ընթացքին ունեցած հանդիպումներուն եւ ձեռք բերուած համաձայնութիւններուն մասին: Ընդգծելով, որ համագործակցութեան լայն կարելիութիւններ առկայ են թէ՛ տնտեսական, թէ՛ մշակութային ու գիտական մարզերուն մէջ, նախագահները կարեւոր նկատած են առկայ ներուժի լիարժէք կենսագործումը:
Քաղուած Ազդակ օրաթերթէն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ