Երեք տարուան ընդմիջումէ ետք Ս. Պատարագ մատուցուեցաւ Աղթամարի Ս. Խաչ եկեղեցւոյ մէջ։
Վանի Աղթամար կղզիի Ս. Խաչ հայկական եկեղեցւոյ մէջ երեք տարուան ընդմիջումէ ետք 9 սեպտեմբերին մատուցուած է Ս. պատարագ:
Պոլսոյ հայոց պատրիարքի փոխանորդ Արամ արք. Աթեշեանի նախագահութեամբ Ս. պատարագը տեւած է շուրջ երկու ժամ:
«Անատոլու» լրատու գործակալութեան հաղորդած տեղեկութիւններուն համաձայն, արարողութեան մասնակցած է Թուրքիոյ մշակոյթի եւ զբօսաշրջութեան նախարար Մեհմետ Նուրի Էրսոյ, թուրք պաշտօնեաներ, ինչպէս նաեւ մեծաթիւ հիւրեր` Թուրքիայէն, Հայաստանէն եւ այլ երկիրներէ:
Եկեղեցւոյ տարածքի փոքրութեան պատճառով այցելուները խումբ առ խումբ մտած են ներս: Պատարագէն ետք նախարար Էրսոյն ու Արամ արք. Աթեշեանը խօսքեր արտասանած են:
Սրբազան հայրը` անդրադառնալով Ս. պատարագին, ըսած է, թէ Աղթամար կղզին եւ Ս. Խաչ եկեղեցին պատմական տեսանկիւնէ շատ կարեւոր են: Նախարար Էրսոյ ըսած է, թէ նախորդ երեք տարիներուն Ս. պատարագ չէ մատուցուած ապահովական պատճառներով:
Ս. պատարագէն օրեր առաջ պատրիարքի փոխանորդը ըսած էր, թէ 2011-ին անոր մասնակցած էին 7000 անձեր: Այս տարի նոյն թիւի ակնկալութիւն չկայ, սակայն 2000-3000 հոգի հաւանաբար մասնակցին, ինչ որ քիչ թիւ չէ: «Որքան տեղեակ ենք, հիմա ալ Վան քաղաքին մէջ մեծ ոգեւորութիւն կը տիրէ, պանդոկները բոլոր ապահովուած են հիւրերու կողմէ», դիտել տուած է ան:
Նշենք, որ եկեղեցւոյ մէջ Ս. պատարագ մատուցելու արտօնութիւն տրուած է միայն տարին մէկ անգամ` Խաչվերաց տօնին նախորդող կիրակին:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
