Ռայի Պատրիարքի կոչը քաղաքական բոլոր ուժերուն` դիւրացնելու կառավարութեան կազմութեան հոլովոյթը:
Հանրապետութեան նախագահ զօր. Միշել Աուն երէկ նախագահական պալատին մէջ ընդունեց մարոնի համայնքի Պշարա Ռայի պատրիարքը, որուն հետ քննարկեց լիբանանեան իրադարձութիւնները, յատկապէս քաղաքական բեմը յուզող հարցերը:
Հանդիպումէն ետք Ռայի պատրիարքը յայտնեց, որ ինք նախագահ Աունին այցելած է` երեսփոխանական ընտրութիւններու կայացման առիթով զայն շնորհաւորելու համար: Ան մեծապէս գնահատեց Լիբանանի նորընտիր խորհրդարանին մէջ նոր դէմքեր ունենալու իրականութիւնը:
Ռայի պատրիարքը կոչ ուղղեց Լիբանանի քաղաքական պատասխանատուներուն, այլ խօսքով` քաղաքական ուժերու ղեկավարներուն` դիւրացնելու կառավարութեան կազմութեան հոլովոյթը, աւելցնելով, որ Լիբանան կարիքը ունի բարեկարգումներու:
«Պէտք է կազմել նոր կառավարութիւնը, որպէսզի ան կարենայ դէմ դնել բոլոր մարտահրաւէրներուն, որոնք կը գործեն ի խնդիր հայրենիքի ծառայութեան», ըսաւ ան: Ան կոչ ուղղեց քաղաքական ուժերուն միասնաբար գործելու` կարենալ տապալելու համար փտածութիւնը:
Ռայի պատրիարքը մաղթեց, որ նախարարաց խորհուրդը ըլլայ ազգային միասնականութեան խորհուրդ մը, որ ունենայ արտակարգ կազմ` դիմագրաւելու համար Լիբանանի դէմ ծառացող բազում մարտահրաւէրները:
«Կոչ կ՛ուղղեմ երեսփոխանական պլոքներուն դիւրացնելու կառավարութեան կազմութիւնը, որովհետեւ հանրութեան շահերը որեւէ այլ շահէ առաջ են», ընդգծեց Ռայի պատրիարքը:
Նախագահ Աունի այցելեց նաեւ բրիտանական զինուորական պատուիրակութիւն մը` ընկերակցութեամբ Լիբանանի մէջ Բրիտանիոյ դեսպան Հիւկօ Շորթըրի:
Հանդիպումին ընթացքին քննարկուեցան Լիբանանի դիմագրաւած քաղաքական, տնտեսական, ապահովական եւ ընկերային մարտահրաւէրները:
Շորթըր նշեց, որ անգլիացի բարձրաստիճան զինուորականներու պատուիրակութեան Լիբանան այցելութիւնը կը փաստէ Լիբանանի ներկայացուցած ռազմավարական կարեւորութիւնը` շրջանային կայունութիւնն ու անդորրը պահպանելու իմաստով:
Նշենք, որ կրթութեան եւ բարձրագոյն ուսման նախարար Մարուան Համատէ եւս այցելեց նախագահ Աունի, որուն հետ քննարկեց երկրին իրադարձութիւնները ու կրթութեան մարզին դիմագրաւած հարցերը:
Քաղուած «Ազդակ»-էն
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ