Ազգային Ժողովը դէմ քուէարկեց վարչապետի թեկնածութեան։
Իրաւունքի ուժով գումարուած Ազգային ժողովի յատուկ նիստին Ազգային ժողովը դէմ քուէարկեց Նիկոլ Փաշինեանին՝ որպէս վարչապետի թեկնածու՝ 45 կողմ, 56 դէմ քուէարկութեամբ:
Նիկոլ Փաշինեանին դէմ քուէարկեց ՀՀԿ խմբակցութիւնը, կողմ՝ ՀՅԴ-ն եւ «Ծառուկեան» խմբակցութիւնները:
Նիկոլ Փաշինեան Ընդհանուր Գործադուլի Կոչ Կ՛ուղղէ
Ժողովրդային շարժման ղեկավար Նիկոլ Փաշինեան Ազգային ժողովի քուէարկութենէն ետք Հանրապետութեան հրապարակին վրայ զինք սպասող բազմահազար զօրակցողներուն միանալով՝ յայտարարեց, որ ի վերջոյ ժողովրդական յեղափոխութիւնը իր յաղթական աւարտին պիտի հասնի:
Փաշինեան ընդհանուր գործադուլի ու դասադուլի կոչ ուղղեց: Ան նաեւ յայտարարեց, որ Չորեքշաբթի օրուընէ սկսեալ ժողովուրդը պիտի շրջափակէ պետական շէնքերը՝ անդամալուծելով կառավարութեան գործունէութիւնը: Փաշինեան նաեւ յայտարարեց, որ ցուցարարները պիտի փակեն օդակայանը:
(Քաղուած Ասպարէզ-էն)
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ