Քահանայապետական անուանում. Արեւելեան եկեղեցիներու վերատեսչութեան նոր քարտուղար

Վազգէն Աբարդեան - Վատիկան

Չորեքշաբթի, 15 փետրուարին, Ֆրանչիսկոս Սրբազան Քահանայապետը Արեւելեան Եկեղեցիներու վերատեսչութեան քարտուղար անուանեց Լիբանանի մէջ Անտոնեան համալսարանի տեսուչ` Հայր Միշէլ Ժալախը։

Հայր Միշէ Ժալախ ծնած է Լիբանանի Պաուշրիէ շրջանին մէջ՝ 27 օգոստոս 1966ին։ Ան 15 օգոստոս 1983ին, կատարած է իր կրօնաւորական առաջին ուխտերը Մարոնիներու Անտոնեան միաբանութեան մէջ, ապա 21 ապրիլ 1991ին, ձեռնադրուած է քահանայ։

2000-ի դեկտեմբեր ամիսէն սկսեալ մինչեւ 2008ին յուլիս ամիսը ծառայած է Արեւելեան Եկեղեցիներուն ժողովի քարտուղարութեան բաժանմունքին մէջ։

2008ին, Հռոմի քահանայապետական Արեւելեան համալսարանի մէջ ստացած է եկեղեցաբանութեան տոքթորի կոչում։

2013-էն մինչեւ 2018 տարիներուն նշանակուած է Միջին Արեւելքի Եկեղեցիներուն Խորհուրդի ընդհանուր քարտուղար ինչպէս նաեւ Լիբանանի կաթողիկէ պատրիարքներուն եւ եպիսկոպոսներու ժողովի համամիութենական յարաբերութիւններուն յանձնաժողովին անդամ։

Հայր Միշէլ Ժալախ դասաւանդած է Լիբանանի Մարոնիներու Անտոնեան համալսարանին մէջ, 2017ին դառնալով  միւենոյն համալսարանի ընդհանուր տեսուչը։