Ընդհանուր ակնարկ մը Պենետիկտոս ԺԶ.ի Քահանայապետութեան մասին. հարուստ եղելութիւններով Քահանայապետութիւն։

Վատիկան Նիուզ - Հայկական Բաժանմունք

Պենետիկտոս ԺԶ Սրբազան Քահանայապետը, Քահանայապետութեան շրջանին, կատարած է 24 ճամբորդութիւններ, լոյս ընծայած՝ չորս գիրքեր, խորաններու պատուոյն բարձրացուցած՝ 44 սուրբեր եւ նշանակած՝ 90 կարդինալներ։

Պենետիկտոս ԺԶ Քահանայապետը, աւազանի անունով ՝ Ժոզէֆ Ալոզիուս Ռացինկեր, ծնած է 16 ապրիլ 1927-ին, 2005-ի 19 ապրիլէն սկսեալ Հռոմի եպիսկոպոս ընտրուած է ու դարձած՝ կաթողիկէ եկեղեցւոյ 265-րդ Քահանայապետը։

Որպէս ընդհանրական եկեղեցւոյ Քահանայապետ, իշխան Վատիկանի պետութեան, Գահերէց եպիսկոպոսը Իտալիոյ եկեղեցւոյ, ան կաթողիկէ եկեղեցւոյ պատմութեան 9-րդ գերմանացի Քահանայապետն է, ի դէպ, 8-րդը եղաւ Ատրիանոս Զ. Պապը ։

11 փետրուար 2013-ի՝ կարդինալական ժողովին ընթացքին, ան յայտնեց իր կամքը հրաժարելու՝ Հռոմի եպիսկոպոսական աթոռէն, 28 փետրուարի ժամը 20-էն սկսեալ։

Պենետիկտոս ԺԶ եղաւ 8-րդ Քահանայապետը որ Ս. Պետրոսի յաջորդի Աթոռէն կը հրաժարի։ Նախապէս այդ Աթոռէն հրաժարած են` Կեղմես, Բոնցիանոս, Սեղբեստրոս, Պենետիկտոս Թ., Գրիգոր Զ., Չելեսթինօ Ե. եւ Գրիգոր ԺԲ քահանայապետերը։

Եօթը տարի, տասը ամիս եւ իննը օրերու Քահանայապետութեան ընթացքին, Պենետիկտոս ԺԶ -ը կատարեց Իտալիայէն դուրս 24 առաքելական ճամբորդութիւններ, այցելելով 24 երկիրներ։ Սոյն առաքելական ճամբորդութիւններէն 16-ը տեղի ունեցան եւրոպական հողին վրայ (երեք անգամ այցելեց Գերմանիա ու Սպանիա)։ Ամերիկեան ցամաքամաս առաքելական ճամբորդութիւն կատարեց երեք անգամ, երեք անգամ Ասիա, երկու անգամ Ափրիկէ եւ մէկ անգամ Ովկեանեան ցամաքամաս։

Պենետիկտոս Քահանայապետը մասնակցեցաւ երիտասարդներու համաշխարհային հաւաքներուն` Քէոլն՝ 2005-ին, Սիտնի 2008-ին եւ Մատրիտ 2011-ին։ Տրուած ըլլալով որ Ան հրաժարականը ներկայացուց 2013-ի Փետրուարին, չի կարողացաւ մասնակցիլ 2013-ին Ռիօ տէ Ժանէյրոյի երիտասրադաց հաւաքին, թէեւ ճամբորդութիւնը յատարարուած էր նախօրոք։

Պենետիկտոս ԺԶ.ի Քահանապետական Գլխաւոր Բնագիրները.

Պենետիկտոս ԺԶ. Քահանայապետը ունի երեք շրջաբերական թուղթեր` ''Աստուած սէր է'' հրատարակուած՝ 25 յունուար 2006-ին, ''Փրկարար յոյսը''` հրապարակուած՝ 30 նոյեմբեր 2007-ին, ''Սէրը ճշմարտութեան մէջ''՝ հրատարակուած 7 յուլիս 2009-ին։ Ան հրապարակած է նաեւ յետ սիւնհոդոսական չորս առաքելական յորդորագիրներ` Ս. Հաղորդութեան, Ս. Գիրքի, Ափրիկէի եկեղեցւոյ ու Միջին Արեւելքի եկեղեցւոյ մասին։ Եւ ի լոյս ընծայած՝ Առաքելական Սահմանադրութիւն գլխաւոր մէկ նիւթն է՝ «Անկլիգան հաւատացեալներու յարումը կաթողիկէ եկեղեցւոյ։

Աստուածաբան Քահանայապետը հանրաճանաչ է որպէս գրող. անոր ''Յիսուս Նազովրեցի'' երրեակ հատորները, տպուած է զանազան լեզուներով, ու վաճառուած միլիոնաւոր տպաքանակներով։

Իսկ՝ գերմանացի լրագրող Փիթըր Սիվալտին հետ հրապարակած ''Աշխարհի լոյսը'' հարցում-պատասխան հատորին մէջ, Ան պատասխաններ կու տայ հրատապ հարցերուն եւ կը խօսի քահանայապետութենէն հրաժարելու կարելիութեան մասին։

Տիեզերական եկեղեցւոյ 44 սուրբեր

Պենետիկտոս ԺԶ Քահանայապետը հռչակեց 44 սուրբեր սրբադասումի 10 արարողութիւններու ընթացքին։ Ամէնքը կատարուեցան Ս. Պետրոս հրապարակի վրայ, բացի եղբայր Անթոնիօ տէ Սանդ Աննայի սրբադասումը, որ տեղի ունեցաւ Սան Փաուլոյի մէջ, իր Պրազիլ կատարած առաքելական ճամբորդութեան ընթացքին։

Նորին Սրբութիւնը գումարեց 5 կարդինալական ժողովներ, 90 նոր կարդինալներու նշանակումին համար։ Նոյնպէս գումարեց արտակարգ չորս կարդինալական ժողովներ, շօշափելով՝ հետեւեալ նիւթերը. վաստակաւոր եպիսկոպոսներու պայմանը, Ս. Պիոս 10-րդի անուան եղբայրութիւնը, Վատիկանեան Բ Տիեզերական ժողովի ծիսական բարենորոգումը, համամիութենական երկխօսութեան հայող հարցերը, ընտանիքի պաշտպանութիւնը ու երկխօսութիւնը իսլամութեան հետ։

Նշենք որ Պենետիկտոս ԺԶ Քահանայապետը նախքան հեռանալը Վատիկանէն, փետրուար 28-ին, իր վերջին հանդիպումը վերապահած է կարդինալական դասին։

Նոյն օրուայ երեկոյեան ժամը 5-ին ինքնաթիռով ուղղուեցաւ Քասթել Կանտոլֆօ` քահանայապետական ամարանոցը, ուր մնաց մինչեւ նոր Քահանայապետին ընտրութիւնը։