Հռոմի Թեմին մէջ Սուրբ Պատարագ եւ աղօթք Պենետիկտոս ԺԶ դիտաւորութեան

Ռոպէր Աթթարեան - Վատիկան

Ուրբաթ 30 դեկտեմբեր 2022 ժամը 17,30 Լատերանի Սուրբ Յովհաննէս Պազիլիքյաին մէջ Հռոմի Թեմին Քահանայապետին տեղակալ Արքեպիսկոպոս` Կարդինալ Անճելօ Տէ Տոնաթիսը Սուրբ պատարագ կը մատուցէ, նուիրուած Պենետիկտոս ԺԶ վաստակաւոր Քահանայապետի դիտաւորութեան։

«Ընդառաջելով Ֆրանչիսկոս Պապին խնդրանքին աղօթելու վաստակաւոր Քահանայապետին համար, Հռոմի համայն հասարակութիւնը կը հրաւիրեմ միանալու այդ աղօթքին, ի դիտաւորութիւն Պենետիկտոս ԺԶին, որուն առողջական վիճակը վատթարացած է» գրուած է վերոնշեալ պատարագին լուրը հաղորդող նամակին մէջ, որ կը կրէ Կարդինալ Տէ Տոնաթիսի ստորագրութիւնը եւ որուն մէջ Ան կը խնդրէ «ընկերանալ մեր սիրելի վաստակաւոր եպիսկոպոսին իր այս տառապանքի պահուն, Տիրոջմէ հայցելով, որ մխիթարէ զինքը ու թիկունք կանգնի անոր, իր Եկեղեցւոյ նկատմամբ, մինչեւ վերջ, սիրոյ վկայութեան մէջ»։