Հայոց Ցեղասպանութեան 107-րդ տարելիցի ոգեկոչում (1915-2022)- Պապական նուիրակը այցելեց ծիծեռնակաբերդ

Վատիկան Նիուզ - Հայկական Բաժին

Անցեալ Շաբաթ օրը՝ Ապրիլի 23-ի ուշ երեկոյեան, Երևանի փողոցները՝ Հանրապետութեան Հրապարակէն մինչև որդան կարմիր լոյսով ներկուած Ծիծեռնակաբերդի Հայոց Ցեղասպանութեան զոհերու կրթահամալիրը, լեցուած էին հազարաւոր ու հազարաւոր մարդոցմով, որոնք վառուած մոմերով ու ջահերով յարգանք կը մատուցէին 1915թ.ի Հայոց Ցեղասպանութեան զոհերու յիշատակին։

Կիրակի օրը՝ Ապրիլի 24-ի վաղ առաւօտեան, արևի պայծառ շողացող առաջին իսկ ճառագայթներու հետ միասին, Ծիծեռնակաբերդի Հայոց Ցեղասպանութեան զոհերու յուշահամալիրի ստորոտը համախմբուեցան հասարակական ամենատարբեր խաւերու պատկանող հայեր՝ քաղաքացիական իշխանութիւններ, կրօնական, ռազմական, ակադեմիական, մշակութային հեղինակութիւններ, և միջազգային պատուիրակութիւններ:

Անոնք յարգանքի տուրք մատուցեցին, ծաղկեպսակներ զետեղեցին յուշահամալիրի պատերուն, և ծաղկեփնջեր՝ անմար կրակի շուրջը: Մի քանի մետր բարձրութեամբ կուտակուած ծաղիկները յարգանքի ապշեցուցիչ դրսևորում էին:

Պապապկան նուիրակը

Սբ. Յովհաննէս Պօղոս Բ և Ն.Ս. Ֆրանցիսկոս Պապը Հայաստան կատարած իրենց այցելութիւններու ժամանակ այցելած են այս յուշահամալիր։ Առաքելական Նուիրակ Ն.Գ. Խօսէ Ա. Պեթանքուրը իր կարգին յարգանք մատուցեց Ցեղասպանութեան զոհերուն՝ Սուրբ Աթոռի անունով ծաղկեպսակ մը զետեղելով, աղօթքներ բարձրացնելով ննջեցեալներու համար և հայցելով Աստուծոյ օրհնութիւնը՝ Հայաստանի մէջ խաղաղութեան համար և ողջ մարդկութեան համար` համայն աշխարհի մէջ։

Այս օրերը լի են անցեալի ու ներկայի յիշողութիւններով, յոյզերով ու ցաւով: Ողջ Ազգը և յատկապէս Հայոց Ցեղասպանութեան զոհերու յետնորդները կը յիշեն պատմական անարդարութիւնները, որ մնացած են առանց ճանաչման: Այսօր շարունակուող տարածաշրջանային հակամարտութիւնները, ռազմատենչ հետեւաբանութիւնը և սադրիչ արարքները աւելի կը բորբոքեն պատմական թշնամանքը: Խնդիրը կը պահանջէ միջազգային ներգրաւուածութիւն։ Ծիծեռնակաբերդի յուշահամալիրը կը յիշեցնէ, որ մարդկութիւնն այլևս երբեք չի կրնար վայրագութիւններ թոյլ տալ մարդկային արժանապատուութեան դէմ:

Թղթակցութիւնը ՀՀ Սուրբ Աթոռի դեսպանութիւն