Քորոնա ժահրի վերաբերեալ մարդկային համապարփակ զարգացման ժողովի յորդորը:
Վազգէն Աբարդեան - Վատիկան
Քահանայապետական մարդկային համապարփակ ժողովին նախագահ Կարդինալ Փիթեր Թուրքսոն, Երկուշաբթի, 24 փետրուարին,Վատիկանի մամլոյ գրասենեակի մէջ Ֆրանչիսկոս Պապին քառասնորդաց մեծ պահքի պատգամը ներկայացուած ժամանակ անդրադարձած է նաեւ Քորոնա ժահրի տարածման ու անոր կանխարգիլման ուղղութեամբ ձեռնարկուող միջոցառումներուն:
Ծիրանաւոր նշած է թէ քահանայապետական ժողովը մօտէն կը հետեւի եւ կը վերահսկէ քորոնա ժահրի տարածման երեւոյթին եւ պատրաստ է իր նպաստը բերելու յատուկէն դիւրաբեկ եւ տկար առողջապահական համակարգ ունեցող երկիրներուն մէջ Քորոնա ժահրի տարածման պարագային:
Կարդինալ Թուրքսոն ապա անդրադառնալով աշխարհի տարբեր թեմերէն ներս Քորոնա ժահրին կանխարգիլման ուղղութեամբ ձեռնարկուած միջոցառումներուն, նկատել տուաւ որ Քորոնա ժահրը դիւրինութեամբ վարակիչ ըլլալով հանդերձ կարելէ է շարունակել պատարագ մատուցանել եկեղեցիներէն ներս, սակայն, թելադրեց Ան, հարկաւոր է բազմապատկել պատարագներուն թիւը, խուսափելու համար հաւատացեալներուն մեծ թիւի ներկայութենէն:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
