Պօղոս Զ Քահանայապետի մահուան տարեդարձը՝ Բարենորոգումի Քահանայապետը։
Ռոպէր Աթթարեան - Վատիկան
6 օգոստոս 1978-ին՝ Յիսուսի այլակերպութեան տօնին օրը, Քասթել Կանտոլֆոյի Պապական ամարանոցին մէջ, իր մահկանացուն կը կնքէր աւազանի անունով Ճովաննի Պաթթիսթա Մոնթինի՝ Պօղոս Զ Քահանայապետը։ Ան ծնած էր Իտալիոյ Պրեշիա քաղաքի՝ Քոնչեսի գիւղաքաղաքին մէջ՝ 26 սեպտեմբեր 1897-ին։ Քահանայապետ ընտրուած է 21 յունիս 1963ին, յաջորդելով Սուրբ Յովհաննէս ԻԳ. Պապին ու շարունակելով այս վերջինիս սկսած Վատիկանեան Բ. Տիեզերական ժողովը։
Աշխարհի մեծ յեղաշրջումի ժամանակամիջոցին, Պօղոս Զ Պապը Տիեզերական եկեղեցին ղեկավարած է մեծ ուշիմութեամբ։ Ան եղած է Եկեղեցւոյ բարեկարգումի մեծ դերակատարը ու թափ տուած է Քահանայապետերու միջազգային ճամբորդութիւններուն։
1964ին այցելած է Սուրբ Երկիր, Երուսաղէմի մէջ հանդիպելով Պատրիարք Աթենակորասի հետ։ Հանդիպում որ հանդիսացած է նոր համամիութենականութեան հիմնաքարը։
Տարի մը վերջ ուղերձ մը տուած է ՄԱԿ-ի մէջ, որուն ընթացքին վճռակամ կոչ ուղղած էր խուսափելու հակամարտութիւններէն բացագանչելով «ոչ երբեք պատերազմ»։
Մեծ ջանք թափած է համամիութենականութեան, արդարութեան, խաղաղութեան, միջկրօնական երկխօսութեան գործընթացքներու ուղիով ինչպէս նաեւ մեծ ուշադրութիւն յատկացուցած է հաղորդամիջոցներու դերակատարութեան։ Սկիզբ դրած է Եկեղեցւոյ օրինագրքի նոր մշակումին, որ իր աւարտին հասած է 1983 թուականին։
Մասնաւոր ակնածանք վայելած է իր խաղաղութեան եւ ընկերային խնդիրներու նուիրուած շրջաբերականներուն համար։
Պենետիկտոս ԺԶ վաստաաւոր Քահանայապետի օրով Պօղոս Զ Պապը կը դասուի Աստուծոյ Ծառաներու շարքին, 19 հոկտեմբեր 2014-ին Ֆրանչիսկոս Պապ` զայն կը հռչակէ Երանելի, ու 14 հոկտեմբեր 2018-ին, Սուրբ Պետրոսի հրապարակին վրայ նախագահած հանդիսաւոր արարողութեամբ, զայն կը հռչակէ Տիեզերական եկեղեցւոյ Սուրբ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ