Որոնել

Vatican News
Եպիսկոպոսական հաւաքի մամլոյ ասուլիս Եպիսկոպոսական հաւաքի մամլոյ ասուլիս 

Եկեղեցւոյ մէջ անչափահասներու պաշտպանութիւն. Ուղեւորութիւնը կը շարունակուի։

Պատասխանատուութիւն, հաշուետուութեան պարտաւորութիւնը ու թափանցիկութիւնը բանալի բառեր են զոր ժողովականները իրենց հետ կը տանին

Ռոպէր Աթթարեան - Վատիկան

Կիրակի 24 փետրուար 2019-ին, Ֆրանչիսկոս Սրբազան Քահանայապետին Առաքելական պալատի Ռեճա դահլիճին մէջ մատուցած Սուրբ պատարագով վերջ գտաւ Վատիկանի մէջ գումարուած Եկեղեցւոյ մէջ անչափահասներու պաշտպանութեան նուիրուած եպիսկոպոսական վեհաժողովը՝ որուն իրենց մասնակցութիւնը բերին աշխարհի բոլոր եպիսկոպոսական համահաւաք դասերու նախագահները, Արեւելեան եկեղեցիներու Պատրիարքներ, Միաբանութիւններու մեծաւորներ, կարդինալներու ու հրաւիրեալ եպիսկոպոսներ։ Ժողովականներու շարքին էին  Տանն Կիլիկիոյ Կաթողիկէ Հայոց Գրիգոր Պետրոս Ի Կաթողիկոս Պատրիարքը եւ Հայաստանի ու Արեւելեան Եւրոպայի Հայ կաթողիկէներու առաջնորդը՝ Արհ Ռաֆայէլ Արքեպիսկոպոս Մինասեան։

Ունկնդրէ լուրը

Վերոնշեալ Սուրբ պատարագի աւարտին Հռոմի Աուկուսթինաինում Հայրաբանական կաճարի սրահին մէջ տեղի ունեցաւ հաւաքին ընթացքին նախատեսուած մամլոյ ասուլիսներուն վերջինը որուն ընթացքին ունեցած ելոյթին մէջ հաւաքին վարիչը՝  Յիսուսեան Միաբանութեան անդամ ու Ռացինկեր հիմնարկի նախագահ Հայր Ֆետերիքօ Լոմպարտի, յայտնեց որ հաւաքը վերջ գտաւ սակայն ուղեւորութիւնը կը շարունակուի, այս ծիրէն ներս յայտարարելով Ֆրանչիսկոս Սրբազան Քահանայապետին ինքնագիր մէկ նամակի հրատարակութիւնը ու Վատիկանի Պետութեան նոր օրէնքի մը որդեգրումը հայող անչափահասներու ու  խոցելի անձերու պաշտպանութեան» ինչպէս  նաեւ այդ առնչութեամբ Վատիկանի յատկացուած յատուկ ուղեցոյց մը։ Ասոնց կից Հաւատոյ Դաւանանքի Վարդապետութեան ժողովը պիտի հրապարակէ «տեղեկագիր ուղեցոյց» մը օգնելու համար աշխարհի եպիսկոպոսները լաւապէս հասկնալու իրենց պարտականութիւնն ու պարտաւորութիւնը, ապա դժուարութեան մէջ գտնուող եպիսկոպոսական համահաւաք դասերու օգնութեան ի նպաստ պիտի ստեղծուի յատուկ «յանձնախումբ» մը։

Հայր Լոմպարտին հուսկ յանուն եկեղեցւոյ ներողութիւն խնդրեց  եկեղեցւոյ ներքոյ գործադրուած չարաշահումներու ոճիրին համար ու շեշտեց թէ պատասխանատուութիւնը, հաշուետուութեան պարտաւորութիւնը ու թափանցիկութիւնը  կը հանդիսանան բանալի բառեր զոր ժողովականները իրենց հետ պիտի տանին իրենց առաքելավայրերը։

Մամլոյ ասուլիսին ընթացքին խօսք առաւ նաեւ Վատիկանի Հաղորդակցութեան Բաժանմունքի Կառավարիչը՝ Տիար Փաոլօ Ռուֆֆինի որ կարեւորեց հաղորդակցութեան ոճին թափանցիկութեան ու ճշմարտութիւնը հաղորդուելու անհրաժեշտութիւնը։ «Ճշմարտութիւնը ժամանման կէտ է՝ որ կը պահանջէ քաջութիւն եւ չընդունիր ոչ նախապաշարում եւ ոչ ալ առանձնաշնորհում, ոչ դիւրանցում եւ ոչ ալ թաքնացնում։ Ճշմարտութիւնը կը պահանջէ քաջութիւն՝ ըլլայ ըսելու – խօսելու, ըլլայ ունկնդրելու մէջ» հաստատեց Ռուֆֆինի։  

25/02/2019, 10:12