Յանուն Ֆրանչիսկոս Պապին օժանդակութիւն Ֆուեկօ հրաբուխի թիրախներուն:
Վազգէն Աբարդեան - Վատիկան
Երեքշաբթի, 19 յունիս 2018-ին, Վատիկանի մարդկային համապարփակ զարգացումի բաժանմունքը հրապարակեց հաղորդագրութիւն մը նշելով, որ Կուաթեմալայի Ֆուեկօ հրաբուխի ժայթքումին հետեւանքով վնասուած են աւլի քան 1,7 միլիոն անձեր: 13 հազար անձեր ստիպուած եղան հեռանալ իրենց բնակարաններէն, արձանագրուած են հարիւրաւոր մեռեալներ եւ անթիւ վիրաւորներ:
Ֆրանչիսկոս Սրբազան Քահանայապետը, մարդկային համապարփակ զարգացումի բաժանմունքի միջոցաւ որոշած է 100 հազար ամերիկեան տոլար տրամադրել՝ շտապ վիճակի մէջ գտնուող բնակչութեան:
Յիշեալ նիւթական օժանդակութիւնը, որ կը համարուի Ֆրանչիսկոս Պապին հոգեւոր մօտիկութեան արտայայտութիւնը ինչպէս նաեւ հայրական քաջալերանքը, պիտի բաշխուի Կուաթեմալային մէջ Պապական Նուիրակի համագործակցութեամբ՝ ամենէն շատ տուժուած թեմերուն եւ պիտի տրամադրուի ՝ հրաբուխի ժայթքումէն տուժած անձերուն խնամակալական ծառայութեան:
Հաղորդագրութեան մէջ կը նշուի նաեւ որ Կուաթեմալայի ժողովուրդի օգնութեան յիշեալ նիւթական սատարը՝ աղօթքի աջակցութեամբ, մաս կը կազմէ Կաթողիկէ եկեղեցւոյ օժանդակութիւններուն, որոնք եպիսկոպոսական համահաւաք դասերեէն անդին, կը ներառեն եղբայրասիրական բազմաթիւ կազմակերպութիւններ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
