Քահանայապետը աղօթեց բոլոր հայրերուն համար ու մօտիկութիւն արտայայտեց Էքուատորի բնակիչներուն

Ռոպէր Աթթարեան - Վատիկան

Կիրակի 19 Մարտ 2023ի կէսօրին իր գրասենեակի պատուհանէն արտասանած Հրեշտակ Տեառն Մարեմեան աղօթքի աւարտին Ֆրանչիսկոս Սրբազան Քահանայապետը խօսքը ուղղելով հրապարակին վրայ համախմբուած հազարաւոր ուխտաւորներուն նախ յիշեց երէկ Էքուատորը հարուածող երկրաշարժը` իր մօտիկութիւնը արտայայտելով բնակչութեան ու մասնաւորապէս աղօթքներ ապահովեցնելով մեռեալներուն ու բոլոր տառապողներուն։

«Athletica Vaticana»ի զօրակցութեան ձեռնարկը

Ան ապա ողջունեց տարբեր երկիրներէ ժամանած ուխտաւորները յատուկ ողջոյն մը ուղղելով Հռոմի Մարաթոնի մասնակցողներուն եւ գնահատելով «Athletica Vaticana» Վատիկանի մարզիկներու ընկերակցութիւնը, որ այդ կարեւոր մարզական ձեռնարկը դարձուց աղքատներուն ի նպաստ զօրակցութեան առիթ։

Աղօթք հայրերուն համար

Նորին Սրբութիւնը հուսկ յատուկ շնորհաւորութիւններ ուղղեց հայրերուն որոնց տօնը կը յիշատակուի այսօր Իտալիոյ մէջ։ «Թող` որ անոնք Սուրբ Յովսէփին մէջ գտնեն տիպարը, աջակցութիւնը եւ քաջալերանքը լաւապէս ապրելու համար իրենց հայրութիւնը» ըսաւ Քահանայապետը եւ հրաւիրեց բոլորը անոնց դիտաւորութեան աղօթելու «Հայր մերը» տէրունական աղօթքը։

Նախ քան հրաժեշտ առելը Սրբազան Պապը դարձեալ խնդրեց չմոռնալ ուքրանիոյ մարտիրոս ժողովուրդին համար աղօթել հուսկ բոլորին մաղթեց բարի կիրակի խնդրելով որ չմոռնան նաեւ իրեն համար աղօթելու։