Ֆրանչիսկոս Պապը ունկնդրութիւն շնորհեց Իտալիոյ Վարչապետ Ճորճա Մելոնիին

Ռոպէր Աթթարեան - Վատիկան

Երեքշաբթի 10 Յունուար 2023ի առաւօտեան Ֆրանչիսկոս Սրբազան Քահանայապետը Վատիկանի Առաքելական պալատէն ներս ունկնդրութիւն շնորհեց Իտալիոյ հանրապետութեան Նախարարներու Խորհուրդի նախագահ Տիկ. Ճորճա Մելոնիին, որ ապա հանդիպում ունեցաւ Սուրբ Աթոռի Պետական Քարտուղար Կարդինալ Փիեթրօ Փարոլինին հետ, որուն կ՜ընկերանար Պետութիւններու եւ Միջազգային կազմակերպութիւններու հետ յարաբերութիւններու քարտուղարը` Գերապայծառ Փոլ Կալլակէր։ Լուրը կը հաղորդէ Սուրբ Աթոռի Մամլոյ գրասենեակը, նշելով նաեւ` որ Պետական քարտուղարութեան մէջ տեղի ունեցած սիրալիր զրոյցներու ընթացքին ընդգծուեցան երկկողմանի բարի յարաբերութիւնները եւ անդրադարձ կատարուեցաւ մի քանի հարցերու մասին, հայող իտալիոյ ընկերային իրավիճակին, յատուկ յղում կատարելիով աղքատութեան դէմ պայքարի եւ ընտանիքի հարցերուն, ինչպէս նաեւ ժողովրդագրական երեւոյթին եւ երիտասարդներու դաստիարակութեան հայող հարցերուն։

Շօշափուեցան նաեւ միջազգային բնոյթ ունեցող նիւթեր որոնց ծիրէն ներս Եւրոպան, Ուքրանիոյ մէջ պատերազմը եւ գաղթականութիւնը։

Ֆրանչիսկոս Պապին եւ Իտալիոյ Վարչապետին միջեւ հանդիպումն ու  զրոյցը տեւեց 35 վայրկեան։