Ֆրանչիսկոս Պապ իր ցաւակցութիւնը կը յայտնէ Նեփալի մէջ ջախջախուած օդանաւին համար։
Վազգէն Աբարդեան - Վատիկան
Կիրակի, 15 յունուարին, Նեփալի Փոքարա քաղաքի մօտակայքը թռիչքի ընթացքին ջախջախուած է Եթի օդանաւային ընկերութեան պատկան օդանաւ մը, որուն հետեւանքով արձանագրուեցան 68 մեռեալներ, որոնց շարքին երեք մանուկներ ու նորածին մը։
Այս տխուր արկածին ի լուր Վատիկանի Պետական քարտուղար կարդինալ Փիեթրօ Փարոլին Ֆրանչիսկոս Պապի անունով ցաւակցական գիր յղեց Նեփալի նախագահ տիար Պիտյա Տեվի Պհանտարիի, յայտնելով Նորին Սրբութեան տխրութիւնը ողբերգական արկածին համար, ինչպէս նաեւ ցաւակցութիւններըաղէտէն տուժուած անձերուն համար, ապահովուելով Ֆրանչիսկոս Պապին աղօթքը բոլոր անոնց համար, որոնք ներգրաւուած են վերականգման շտապ աշխատանքներուն։
Ցաւակցական գիրին մէջ նշուած է որ ֆրանչիսկոս Պապ ջախջախուած օդանաւի հետեւանքով զոհուածներու հոգիները կը յանձնէ Ամենակալի ողորմութեան ու խաղաղութեան եւ ամոքումի Աստուածային օրհնութիւնները կը հայցէ բոլոր անոնց վրայ, որոնք կը ողբան իրենց սիրելիներու մահը։
Յայտնենք, թէ Նեփալի մէջ քաղաքական պատասխանատույի մը համաձայն, ջախջախուած օդանաւէն վերապրողները գտնելու յոյսը առ այժմ զերոյական է։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
