Պենետիկտոս ԺԶ-ին յուղարկաւորութիւնը. Համայն աշխարհէն պատուիրակութիւններ, նաեւ հայ եկեղեցին ու պետութիւնը։
Ռոպէր Աթթարեան - Վատիկան
Հինգշաբթի՝ 5 Յունուարին, Ֆրանչիսկոս Պապի գլխաւորութեամբ Սուրբ Պետրոս տաճարի հրապարակին վրայ, ժամը 9.30-ին սկիզբ առնող Պենետիկտոս ԺԶ Քահանայապետին յուղարկաւորութեան արարողութեան նախապատրաստական աշխատանքներու վերջին կարգադրութիւնները կը հասնին իրենց աւարտին։
Համայն աշխարհէն ներկայացուցիչներ
Այս առթիւ սպասուած են պաշտօնական եւ համամիութենական պատուիրակութիւններ` ինչպէս, Իտալիոյ հանրաետութեան եւ Գերմանիոյ Դաշնութեան պատուիրակութիւնները, Կ. Պոլսոյ եւ Մոսկուայի օրթոտոքս եկեղեցիներու պատուիրակութիւնները ապա Եւրոպայի, Միացեալ նահանգներու եւ Ասիական ցամաքամասի պատուիրկաութիւնները, որոնց շարքին նաեւ Եկեղեցիներու համամիութենական Խորհուդի ներկայացուցիչը։
Հայ Եկեղեցւոյ մասնակցութիւնը
Պենետիկտոս ԺԶ Քահանայապետի յուղարկաւորութեան կը մասնակցին նաեւ Հայ Եկեղեցին ու Պետութիւնը, գլխաւորութեամբ Տանն Կիլիկիոյ Կաթողիկէ Հայոց Ռաֆայէլ Պետրոս ԻԱ Կաթողիկոս Պատրիարքին։
Յանուն Հայաստանի Հանրապետութեան Ներկայ կը գտնուի Սուրբ Աթոռի մօտ արտակարգ եւ լիազօր դեսպան` վսեմաշուք Կարեն Նազարեանը։
Մայր Աթոռ Սուրբ Էջմիածինէն կը մասնակցին` Արեւմտեան Եւրոպայի Հայրապետական պատուիրակ եւ Վատիկանի մօտ Մայր Աթոռի ներկայացուցիչ Գերշ Տ. Խաժակ Արք. Պարսամեան, Տաւուշ թեմի առաջնորդ` Գերշ. Բագրատ Եպս. Գալստանեան եւ Կենտրոնական Եւրոպայի եւ Շուէտի Հայրապետական պատուիրակ` Գերշ. Տ. Տիրան եպս. Պետրոսեան, մինչ որպէս Արամ Ա Վեհափառ Հայրապետին ներկայացուցիչ` Հռոմ ժամանած է Նարեկ Արքեպիսկոպոս Ալեմեզեանը։
Արարողութեան ներկայ կը գտնուի նաեւ Հայ Կաթողիկէ պատրիարքարանի Պէյրութի թեմի օգնական եպիսկոպոս` Արհիապատիւ Գէորգ Ասատուրեան, ինչպէս Նաեւ Լեւոնեան Ք. Վարժարանի մեծաւոր եւ Երուսաղէմի հայ կաթողիկէ համայնքի Էկզարկ, Նարեկ Թ. Ծ. Վ, նաամոյանը ու այլ հայ կաթողիկէ եկեղեցւոյ կղերականներ։
Ֆրանչիսկոս Պապին աղօթքը
«Ով Աստուած, որ քու նախախնամութեան նախագիծով կոչեցիր քու օրհնեալ ծառան առաջնորդելու Եկեղեցին, շնորհէ Անոր` քու Որդիիդ յաւիտենական Փառքի մասնակցութիւնը երկինքի մէջ, որուն Ան ծառայեց որպէս տեղապահ երկրի վրայ»: Խօսքի ծիսակատարութիւնը կանխող այս աղօթքով Ֆրանչիսկոս Պապը պիտի յիշէ իր նախորդը` վաստակաւոր Քահանայապետ Պենետիկտոս ԺԶ-ը, Սուրբ Պետրոս հրապարակին վրայ հինգշաբթի 5 Յունուարի առաւօտեան 9,30ին կայանալիք յուղարկաւորութեան արարողութեան ընթացքին։
120 կարդինալներ 400 եպիսկոպոսներ
Սրբազան Քահանայապետ Ֆրանչիսկոսին հետ պիտի համապատարագեն, բացի Կարդինալական դասի աւագերէց Կարդինալ Ճովաննի Պաթթիսա Ռէէին, աւելի քան 120 կարդինալներ, 400 եպիսկոպոսներ և չորս հազարէ աւելի քահանաներ։ Մինչ նախատեսուած է 60 հազարէ աւելի հաւատացեալներու ներկայութիւնը։
Դագաղի փակման կարգը
Չորեքշաբթի եկեկոյեան ժամը 7-ին, Սուրբ Պետրոս Պազիլիքայի փակումէն յետոյ, տեղի պիտի ունենայ դագաղի փակման արարողութիւնը, անոր մէջ, Քահանայապետերու թաղման կարգի աւանդութեան համաձայն, զետեղելով, վաստակաւոր Քահանայապետին հովուապետութեան ժամանակ հատուած շքանշանները ու մետաղադրամները, Միւնխենի և Հռոմի մետրոպոլիտ արքեպիսկոպոսի պալիումները, այնուհետև թղթածրարը որ հակիրճ կերպով կը նկարագրէ Ռացինկեր Պապին հովուապետութիւնը՝ մետաղեայ գլանով։
Յուղարկաւորութիւնը
Պենետիկտոս ԺԶ աճիւններով դագաղը հինգշաբթի ժամը 8.45-ին կը բերուի Սուրբ Պետրոս հրապարակ, ուր նախատեսուած է հաւատացեալներու վարդարանի աղօթքը։ Այնուհետև, տեղի կ՛ունենայ վաստակաւոր Քահանայապետին յուղարկաւորութեան արարողութիւնը, որուն աւարտին Ֆրանչիսկոս Պապը պիտի նախագահէ նաեւ թաղման կարգը հուսկ դագաղը պիտի փոխադրուի Սուրբ Պետրոս պազիլիքայի գետնադամբան, ու պիտի զետեղուի Սուրբ Յովհաննէս Պօղոս Բ-ի պատկանած գերեզմանին մէջ։
Հազարէ աւելի լրագրողներ
Աշխարհի տարբեր վայրերէն Հռոմ ժամանած եւ արարողութիւններուն հետեւելու համար հաւատարմագրուած են գրեթէ հազարէ աւելի լրագրողներ։ Վաստակաւոր Քահանայապետին համար աղօթքները և ծիսակատարութիւնները, որոնք տեղի պիտի ունենան յուղարկաւորութենէն առաջ եւ ետքը, ուղիղ եթերով պիտի սփռուին ամբողջ աշխարհի հեռուստակայաններէն։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
