Ֆրանչիսկոս Պապը յանձնեց Ռացինկեր հիմնարկի 2022 թուականի մրցանակները Փրոֆեսորներ Հայր Ֆէտուին և Վայլերին

Մարիամ Երեմեան – Վատիկան

Ֆրանչիսկոս Սրբազան Քահանայապետը այսօր՝ դեկտեմբերի 1-ին, Առաքելական Պալատի Քլեմենթինա սրահէն ներս նախագահեց Ժոզէֆ Ռացինկեր – Պենետիկտոս ԺԶ հիմնարկի 2022 թուականի մրցանակաբաշխութեան արարողութիւնը։

Այդ առիթով իր պատգամին սկիզբը Սրբազան Պապը ողջունեց մրցանակի արժանացած Փրոֆեսորներ հայր Միշել Ֆէտուին և Ժոզէֆ Հալեւի Հորովից Վայլերին՝ ընդգծելով, որ այն կարևոր առիթ է վերահաստատելու Վաստակաւոր Պապ Պենետիկտոս ԺԶ-ի աստուածաբանական աշխատանքը և ընդհանրապէս անոր արգասաբեր և արդիւնաւէտ մտաւոր ներդրումը։

Պենետիկտոս Պապի արգասաբեր ներդրումը

Ֆրանչիսկոս Պապը ապա յիշեցուց Վաստակաւոր Պապի՝ որպէս փորձագէտ անձնական մասնակցութիւնը, 11 հոկտեմբերին Վատիկանեան Տիեզերական Բ ժողովի բացման նիստի 60ամեակին նուիրուած արարողութեանը․ «Անիկա օգնեց մեզի խորութեամբ կարդալ Ժողովի փաստաթուղթերը՝ առաջարկելով «բարեփոխումներու և շարունակականութեան մեկնութիւն», յարեց Նորին Սրբութիւնը։

Պենետիկտոս Պապի քահանայապետական վարդապետութենէ զատ Ֆրանչիսկոս Պապը նշեց նաև անոր «Opera Omnia» աշխատութիւնը, որ Եկեղեցւոյ, կամ Ռացինկերի խօսքերով «կենդանի Եկեղեցւոյ» ուղիին համար կը հանդիսանայ ամուր աստուածաբանական հիմք։

Սրբազան Քահանայապետը շեշտեց նաև, որ ճիշտ այս հարթութեան մէջ կը տեղաւորուի «Ժոզէֆ Ռացինկեր – Պենետիկտոս ԺԶ» Վատիկանեան հիմնադրամի «աշխատանքը, վարդապետութիւնը և միտքը, որոնք ուղղուած չեն դէպի անցեալը, այլ արգասաբեր են ապագայի, Տիեզերական Ժողովի կիրարկման և Եկեղեցւոյ և այժմեան աշխարհի միջև երկխօսութեան համար բոլոր արդիական ոլորտներուն մէջ, ինչպիսիք են համապարփակ բնապահպանութիւնը, մարդու իրաւունքները, տարբեր մշակոյթներու հանդիպումը», եզրակացուց Ֆրանչիսկոս:

Մրցանակակիրներ Հայր Միշել Ֆէտուն և Ժոզէֆ Հ. Հ.Վայլերը

Ան այնուհետև անդրադարձաւ մրցանակի արժանացած գիտաշխատողներուն, նշելով, որ աշխատանքի ոլորտները ճիշտ է տարբեր են, սակայն Ժոզէֆ Ռացինկերի կողմէ հաւասարապէս յատուկ ուշադրութեան արժանացած են և նկատուած են, որպէս կենսական կարևորութիւն ունեցող։

Հայր Միշել Ֆէտուն քրիստոսաբանութեան վարդապետ է, որ իր կեանքին ընթացքին խորացուցած է ի մասնաւորի Արևելքի և Արևմուտքի Եկեղեցւոյ Հայրերու գործերը և քրիստոսաբանութեան զարգացումը դարերու ընթացքին՝ հայեացքը դէպի ապագան ուղղելով, նշեց Ֆրանչիսկոս Պապը։

Ինչ կը վերաբերի Ժոզէֆ Հ. Հ.Վայլերին Նորին Սրբութիւնը նկատեց, որ անիկա հրէական կրօն դաւանող առաջին մրցանակակիրն է և իր ուրախութիւնը արտայայտեց այդ առումով։ «Պենետիկտոս Պապը վճռականութեամբ և հպարտութեամբ հաստատած է, որ «ի սկզբանէ իր անձնական աստուածաբանական աշխատանքի նպատակը եղած է քրիստոնեաներու և հրեաներու միջև հաշտեցման բոլոր քայլերու խթանումը» (Նամակ Կաթողիկէ Եկեղեցւոյ եպիսկոպոսներուն, 10 մարտի 2009 թ.)», ըսաւ Ֆրանչիսկոս և աւելցուց, որ հրեայ և քրիստոնեայ հաւատացեալներու՝ էական նշանակութիւն ունեցող առարկայական թեմաներու շուրջ միաւորուիլը, մեծ յոյսի նշան է:

Աւարտին Ֆրանչիսկոս Սրբազան Քահանայապետը մէկ անգամ ևս շնորհաւորեց անուանի մրցանակակիրներուն և մաղթեց ամենայն բարիք՝ իրենց յանձնառութեան շարունակութեան համար, աղօթք խնդրելով իրեն համար: