Ֆրանչիսկոս Պապին կոչը Ուքրանիոյ վրայ նոր հրթիռային յարձակման ի տես։

Վազգէն Աբարդեան - Վատիկան

Չորեքշաբթի, 16 նոյեմբերին, Սուրբ Պետրոսի հրապարակին վրայ կատարած հրապարակային ընդհանուր ունկնդրութեան աւարտին ինչպէս միշտ Ֆրանչիսկոս Պապ ողջունեց Իտալացի եւ օտարերկրեայ ուխտաւորները։

Իտալացի ուխտաւորներուն յղած ողջոյնի խօսքին մէջ Սրբազան Հայրը յատուկէն ողջունեց Piccole Apostole della Redenzione միաբանութեան անդամները, Leoniano di Anagni նորընծայարանի հասարակութիւնը, որոնց ընկերացած են Լացիօ մարզի եպիսկոպոսները, խրախուսելով,« յառաջ երթալ քաջութեամբ ամրացնելով Տիրոջ եւ եկեղեցւոյ հաւատարմութեան առաջադրութիւնները»։

Ֆրանչիսկոս Պապ ապա յայտնեց, որ կ՝աղօթէ Պոլսոյ մէջ անցեալ օրերուն տեղի ունեցած ահաբեկչական արարքին անմեղ զոհերուն համար, ինչպէս նաեւ Ուքրանիոյ համար, հայցելով Տիրոջմէ որ Ուքրանացիներուն շնորհէ մխիթարութիւն, փորձութեան մէջ զօրութիւն ու խաղաղութեան յոյսը։

Սրբազան Հայրը ապա յատուկէն կոչ ուղղեց ըսելով.

Ցաւով եւ մտահոգութեամբ տեղեկացայ Ուքրանիոյ վրայ նոր եւ աւելի զօրաւոր հրթիռային յարձակման լուրը, որ զոհերու եւ բազմաթիւ քաղաքացիական ենթակառոյցներուն կործանման պատճառ դարձաւ։

Կ՝աղօթենք որպէսզի Տէրը դարձի բերէ սիրտերը անոնց որոնք կը կեդրոնանան պատերազմին վրայ ու գերիշխէ խաղաղութեան ցանկութիւնը տառապած Ուքրանիոյ մէջ, խուսափելու համար որեւէ ճակատումէն եւ բանալու երկխօսութեան եւ հրադադարի ուղիները»։

Նորին Սրբութիւնը հուսկ սովորութեան համաձայն յիշեց երիտասարդները, հիւանդները, տարեցները, նորապսակները, քաջալերելով զանոնք հետեւելու այսօր իրենց ծիսական տօնը նշուող Սքովտիոյ Սրբուհի Մարկերիթային եւ Սրբուհի Կերդրուտին, փնտռելով միշտ Յիսուսի ճրագը եւ ինչպէս նաեւ զօրութիւնը առօրեայ կեանքի իւրաքանչիւր որոշումին մէջ։