Քահանայապետը հասաւ Պահրէյն

Ռոպէր Աթթարեան - Վատիկան

Հինգ ժամ տեւած օդանաւային ճանապարհորդութենէն ետքը Ֆրանչիսկոս Սրբազան Քահանայապետը փոխադրող օդանաւը տեղական ժամով 16, 45ին, Հռոմի ժամով 14,45ին, վայրէջք կատարեց Աուալիի միջազգային օդակայան։

Նշենք թէ Ֆրանչիսկոս Պապը ծնկացաւին պատճառով, դէպի Պահրէյն թռիչքի ժամանակ, սովորութեան համաձայն չի մօտեցաւ լրագրողներուն այլ խնդրեց անոնցմէ, որ իրեն մօտենան զիրենք ողջունելու համար։ Ան շնորհակալութիւն յայտնեց անոնց կատարած աշխատանքին եւ ընկերակցութեան համար նշելով, որ Պահրէյնի այս ճամբորդութիւնը «հետաքրքրական» է, որմէ կարող են «բարի լուրեր» ի յայտ գալ։

Աուալի քաղաքի «Shakhir Air base» օդակայան ժամանելուն Ֆրանչիսկոս Պապը օդանաւին մէջ դիմաւորուեցաւ տեղւոյն Առաքելական Նուիրակ Գերապայծառ Էուճէն Մարթին Նուկէնդի կողմէ, իսկ օդակայանի մուտքին տեղի ունեցաւ բարի գալուստի արարողակարգը ի ներկայութեան Պահրէյնի Թագաւոր Համատ Պին Իսա պին Սալման Ալ Խաիֆայի, թագաժառանգին եւ Երկրին Վարչապետին, ինչպէս նաեւ Թագաւորի երեք զաւակներուն ու մէկ թոռնիկին։ Անշուշտ այնտեղ կը գտնուէին նաեւ Կաթողիկէ Եկեղեցւոյ ներկայացուցիչները։

Օդակայանին մէջ տեղի ունեցած բարի գալուստի արարողակարգէն ետք Սրբազան Քահանայապետը կը փոխադրուի Sakhir Royal Palace Թագաւորական պալատ, ուր դարձեալ դիմաւորուի Թագաւորին ու անոր զաւակներուն կողմէ եւ ուր տեղի կ՛ունենայ հակիրճ առանձնական հանդիպում մը` որուն մաս կը կազմեն Սուրբ Աթոռի Պետական Քարտուղար` Կարդինալ Փիեթրօ Փարոլինը, Պետական Քարտուղարութեան տեղակալ` Գերապայծառ Փենիա Փառա, եւ Պետութիւններու ու միջազգային կազմակերպութիւններու հետ յարաբերութիւններու քարտուղար` գերապայծառ Փոլ Կալլակէրը, ինչպէս նաեւ Առաքելական Նուիրակը եւ Նուիրակութեան քարտուղարը։

Առանձնական հանդիպումէն ետքը, պալատական բակին մէջ տեղի կ՛ունենայ բարի գալուստի պաշտօնական արարողութիւնը որմէ ետք Քահանայապետը կը հանդիպի քաղաքական ու քաղաքացիական իշխանութիւններուն հետ, ի ներկայութեան նաեւ Երկրին մէջ գործող դիւանագիտական մարմնի անդամներուն ներկաներուն ուղղելով իր պատգամը։