Որոնել

Senza-titolo-1.png

«Միութեան եւ խաղաղութեան պատգամաւորներ» Ֆրանչիսկոս Պապին Ղազախստան այցին տարբերանշանը

Ֆրանչիսկոս Սրբազան Քահանայապետը յառաջիկայ 13-էն 15 սեպտեմբերին պիտի մեկնի Ղազախստան մասնակցելու համար «Congress of Leaders of World and Traditional Religions»-ի եօթներորդ հաւաքին
Ունկնդրէ լուրը

Ռոպէր Աթթարեան - Վատիկան

Յառաջիկայ 13էն 15 սեպտեմբերին Ֆրանչիսկոս Սրբազան Քահանայապետը պիտի մեկնի Ղազախստան մասնակցելու համար  «Congress of Leaders of World and Traditional Religions»-ի եօթներորդ հաւաքին։ Այս այցելութեան կապակցութեամբ այսօր ի լոյս ընծայուեցաւ «Միութեան եւ խաղաղութեան պատգամաւորներ» կարգախօսով Նորին Սրբութեան ճամբորդութեան տարբերանշանը։

Անոր վրայ պատկերացուած է աղաւնի մը ձիթենիի ճիւղը կտուցին մէջ։ Թեւերը որ պատկերուած են իրար միացած երկու ձեռքերով կ՜ուզեն խորհրդանշել խաղաղութեան և միասնութեան առաքեալներու թևերը:

Երկու թեւերու միջեւ զետեղուած սիրտ մը` որ կը պատկերացնէ սէրը, որ պտուղն է փոխադարձ հասկացողութեան, համագոյակցութեան եւ երկխօսութեան։ Իսկ ձիթենիի ճիւղը գծագրուած է Ղազախական աւանդական ձեւով։

Տարբերանշանին խորքը զետեղուած է «շանիրաք» մը, որ խորհրդանիշն է ղազախ ժողովուրդին աւանդական օճախին, մինչ անոր ներքոյ ներկայացուած է դեղին գոյնով խաչ մը։

Օգտագործուած գոյները` կապոյտն ու դեղինը նոյնինքն Ղազախստանի դրօշի գոյներն են, մինչ սպիտակն ու դեղինը կը ներկայացնեն Վատիկանեան դրօշը։ Կանաչ գոյնը կը ներկայացնէ յոյսը, եւ ինչպէս նշեցինք ճամբորդութեան կարգախօսն է «Միութեան եւ խաղաղութեան պատգամաւորներ», գրուած Ղազախ եւ Ռուսական լեզուներով։

Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ

23/08/2022, 12:31