Միսիոներական Քահանայապետական Գործունէութիւնները կը նշեն հիմնադրումի 200-ամեակը
Մարիամ Երեմեան – Վատիկան
Ֆրանչիսկոս Սրբազան Քահանայապետը նամակ յղած է Միսիոներական Քահանայապետական Գործունէութիւններուն (Pontificie Opere Missionarie – POM), որուն 120 ազգային տնօրէնները և նախագահ Գերապայծառ Ճամփիեթրօ Տալ Թոզոն այսօրուանէ մինչև 23 Մայիս հաւաքուած են Լիոն՝ 200-ամեայ տարեդարձի առիթով Ընդհանրական ժողով գումարելու նպատակով:
Բացի այդ, յաջորդ կիրակի 22 Մայիսին Ժողովուրդներու Աւետարանումի Ժողովի կառավարիչը` Կարդինալ Լուիս Անթոնիօ Թակլէ երանելիներու դասին կ’արժանացնէ չորս միսիոներական Գործունէութիւններէն մէկու՝ «Հաւատքի քարոզչութեան գործունէութեան» հիմնադիր Փոլին Ժարիքոն:
«Փոլին Ժարիքօ կը սիրէր ըսել, որ Եկեղեցին իր էութեամբ միսիոներական է, և որ, հետևաբար, իւրաքանչիւր մկրտուած անձ առաքելութիւն ունի. աւելին, ան ինքը առաքելութիւն է: Օգնել ապրելու այս գիտակցումը Միսիոներական Քահանայապետական Գործունէութիւններու առաջին ծառայութիւնն է», յիշեցուցած է Ֆրանչիսկոս Պապը POM-ին ուղղած նամակին մէջ:
Քահանայապետը այնուհետև ընդգծած է «երեք հայեցակէտերը, որոնք Սուրբ Հոգիի ներգործութեան շնորհիւ այնքան շատ նպաստած են Աւետարանի տարածումին, POM -ի պատմութեան մէջ». միսիոներական դարձը, աղօթքը և առարկայական գթութիւնը:
Պապը յիշատակած է նաև POM-ի ընթացիկ տարուայ տարեդարձերը. Չորս Գործունէութիւններէն երեքը՝ Opera della Propagazione della Fede, Santa Infanzia և San Pietro Apostolo կը բոլորեն «քահանայապետական» աստիճանի արժանանալու 100-ամեակը: Մինչդեռ Pontificia Unione Missionaria-ն պիտի տօնէ իր հիմնադիր երանելի Փաոլօ Մաննայի ծննդեան 150-ամեակը:
Այս տարեդարձերը, բացատրած է Սրբազան Քահանայապետը, կը ներառուին «De Propaganda Fide ժողովի 400-ամեակի տօնակատարութիւններու ծիրէն ներս, որուն հետ սերտօրէն կապուած են Միսիոներական գործունէութիւնները և որու հետ կը համագործակցին Աւետարանի տարածումին աջակցելու նպատակով:
Ի վերջոյ, Ֆրանչիսկոս Պապը իր ուղերձը եզրափակած է՝ մաղթելով POM-ին քալել Փոլին Ժարիքոի` «մեծ միսիոների» ետևէն, «ներշնչուիլ անոր առարկայական հաւատքով, անոր համարձակ խիզախութեամբ» և «ստեղծարար առատաձեռնութեամբ»:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ