Պապի ողջոյնի խօսքը «La Terra Santa» պարբերաթերթի հարիւրամեակի առիթով
Վատիկան նիուզ – Հայկական բաժին
Ֆրանչիսկոս Սրբազան Քահանայապետը այսօր՝ յունուարի 17-ին ընդունել և ողջունել է Սուրբ Երկրի Պահակութեան հաղորդակցութեան գործիչներին՝ «La Terra Santa» (Սուրբ երկիրը) պարբերաթերթի հիմնադրման 100-ամեակի առիթով, ասելով․ «Ծառայութիւնը, որը դուք իրականացնում էք այսօր, համահունչ է հաղորդակցական ներիմացմանը, որն առաջնորդել է Պահակ Ֆերտինանտօ Տիոդալևիին հարիւր տարի առաջ և կայանում է, ինչպէս վերջինս է բնութագրել ամսագրի առաջին համարում, «Սուրբ Երկիրը, Աստծոյ Երկիրը, Քրիստոնէութեան բնօրրանը, պատկառելի սրբավայրերը, ուր իրականացուել է մարդկային սերնդի փրկագործութիւնը, առաւել ճանաչելի դարձնելու» մէջ»:
Պապը նշել է, որ Սուրբ Երկիրը ճանաչելի դարձնել նշանակում է փոխանցել «Հինգերորդ Աւետարանը», այսինքն՝ «պատմական և աշխարհագրական միջավայրը, որտեղ Աստծոյ Խօսքը յայտնուեց և յետոյ մարմին դարձաւ Յիսուս Նազովրեցիի մէջ, մեզ և մեր փրկութեան համար»: Դա նաև նշանակում է ճանաչելի դարձնել այսօր այնտեղ ապրող մարդկանց, տարբեր եկեղեցիների և տարբեր դաւանանքների քրիստոնեաների, ինչպէս նաև հրեաների և մահմեդականների կեանքը՝ Մերձաւոր Արևելքի նման բարդ և դժուարին համատեքստում՝ եղբայրական հասարակութիւն կառուցելու համար։
Հասարակական ցանցերի ժամանակաշրջանում հաղորդակցութիւնը պէտք է ստեղծի եղբայրութիւն
Սրբազան Պապը նկատել է տուել, որ «հասարակական ցանցերի ժամանակաշրջանում հաղորդակցութիւնը պէտք է օգնի ստեղծելու համայնքներ, կամ աւելի ճիշտ՝ եղբայրութիւն» (տես՝ 2019թ. Հաղորդակցութեան համաշխարհային օրուայ ուղերձը) և խրախուսի պատմելու հնարաւոր այնպիսի եղբայրութեան մասին, ինչպիսին Սուրբ Երկրում անձամբ է հնարաւորութիւն ունեցել տեսնելու, պատմելու Աբրահամի բոլոր զաւակների, հրեաների, քրիստոնեաների և մահմեդականների միջև հնարաւոր եղբայրութիւնը: Պատմելու եկեղեցական եղբայրութեան մասին, ուր դռները բաց են գաղթականների, տեղահանուածների և փախստականների առջև:
Հաղորդակցման ժամանակ կարևոր է անձնական փորձը
Ֆրանչիսկոսը շնորհակալութիւն է յայտնել Պահակութեան հաղորդակցութեան գործիչներին, ովքեր ձգտում են հանդիպել մարդկանց՝ անկախ նրանց ապրելավայրից և տեսակից, չեն սահմանափակւում միայն խաղաղ տարածքներով, այցելում են ամենադժուար և տառապող իրողութիւնները, ինչպիսիք են Սիրիան, Լիբանանը, Պաղեստինը և Գազայի հատուածը, փորձում ներկայացնել բարու, պատերազմի չարիքին դիմադրութեան, հաշտութեան, մանկութիւնից խլուած երեխաների արժանապատուութիւնը վերականգնելու, փախստականների ողբերգական պատմութիւնները, բայց նաև նրանց երազանքների ու յոյսերի պատմութիւնները։
«Իսկապէս, շարունակել է Պապը, որոշակի իրականութեան հաղորդակցման ժամանակ ոչինչ չի կարող ամբողջութեամբ փոխարինել անձնական փորձին»։ Յիսուսի գրաւչութիւնը «կախուած էր նրա քարոզի ճշմարտութիւնից, բայց նրա ասածի արդիւնաւէտութիւնը անբաժանելի էր նրա հայեացքից, նրա վերաբերմունքից և նոյնիսկ լռութիւնից: Աշակերտները ոչ միայն լսում էին նրա խօսքերը, այլեւ դիտում էին նրա ելոյթը: Իրականում նրա մէջ՝ մարմնաւոր Խօսքի մէջ, Բանը դարձաւ Դէմք, անտեսանելի Աստուած թոյլ տուեց իրեն տեսնել, զգալ և շօշափել […] (հմմտ. Ա Յովհ. 1:1-3)»:
Հաղորդակցութեան միջոցները հնարաւորութիւնն են տալիս հարստացնելու հաւատը
Սրբազան Պապը շեշտել է, որ հաղորդակցութեան միջոցները հնարաւորութիւն են տալիս հարստացնելու շատերի հաւատը, ովքեր սուրբ վայրեր ուխտագնացութիւն կատարելու հնարաւորութիւնն չունեն։ Նա ասել է նաև, որ աշխարհի հաւատացեալների համար շատ թանկ է հաղորդակցութեան գործիչների Աւետարանին ծառայելու յանձնառութիւնը և խնդրել տուն վերադառնալիս իր ողջոյններն ու օրհնութիւնները փոխանցեն Սուրբ Երկրի ընտանիքներին և քրիստոնէական համայնքներին։
Աւարտին Ֆրանչիսկոսն իր օրհնութիւնն է բաշխել բոլորին և խնդրել Սուրբ Երկրից աղօթել նաև իր համար:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ