Պահպանել եղբայրութիւնը Երկրի վրայ՝ առանց մեր տեսադաշտից դուրս մղելու Երկինքը

Վատիկան Նիուզ

Ֆրանչիսկոս Պապը Իտալիայի Պոլոնիայ քաղաքում անցկացուող G20 միջ կրօնական ժողովի առիթով հանդէս է եկել ուղերձով:

Պապն իր գոհունակութիւնն է յայտնել, որ կրօնական իշխանութիւնները, քաղաքական առաջնորդները և մշակոյթի աշխարհի ներկայացուցիչները համախմբուել են գաղափարների ու յոյսերի փոխանակման միջոցով և յաղթահարելով սեփական առանձնայատկութիւնները, ի նպաստ մարդու հիմնարար իրաւունքների, համայն մարդկութեան միասնութեան և հաշտութեան գործելաոճ որդեգրելու շուրջ:

Կրօնների դերը իսկապէս էական

«Այս հարցում կրօնների դերը իսկապէս էական է: Ես կցանկանայի կրկնել, որ եթէ ուզում ենք պահպանել եղբայրութիւնը Երկրի վրայ, «չենք կարող մեր տեսադաշտից դուրս մղել Երկինքը»: Պէտք է օգնենք միմեանց ազատելու սրբազան հորիզոնը բռնութեան և արմատականութեան մութ ամպերից», ասել է Պապը, շարունակելով, որ այն դեռ հեռաւոր երազ է թւում, եթէ հաշուի է առնւում, որ յաճախ է օգտագործում սրբութիւնը՝ բռնութիւն բռնկելու համար: Վերջին 40 տարում գրեթէ 3000 յարձակում և մօտ 5000 սպանութիւն է տեղի ունեցել տարբեր սրբատեղիներում: Նրանք, ովքեր հայհոյում են Աստծոյ Սուրբ անունը՝ հալածելով իրենց եղբայրներին, շատ հեշտութեամբ են ֆինանսական միջոցներ ստանում: Աւելին, նրանց հրկիզող քարոզը, ովքեր կեղծ աստծոյ անունով ատելութիւն են հրահրում, տարածւում է յաճախ անվերահսկելի ձևով:

Կրթութիւնը բռնութեան դէմ պայքարի միջոց

Սրբազան Քահանայապետը համոզմունք է յայտնել որ բռնութեանը հնարաւոր է հակազդել բոլոր մշակոյթներում առկայ կրօնական անգրագիտութիւնը վերացնելով, հասարակութիւնը կրթելով, քանի որ այնտեղ, որտեղ աղքատութիւնն ու տգիտութիւնը գերակշռում են, արմատական բռնութիւնն աւելի դիւրին է արմատաւորւում:

Մարդկային ընտանիքը պառակտել ցանկացող ատելութեանը հակադրուելու գործում Պապը կարևորել է նաև իւրաքանչիւր աղօթավայրում սպաննուածների մասին ընդհանուր յիշողութիւն հաստատելու առաջարկը և, յիշատակելով Աստուածաշնչական եղբայրասպանութիւնը, շեշտել է, որ պէտք է միասին պահպանել բռնութիւն կրած եղբայրների և քոյրերի ընդհանուր յիշատակը, օգնելով միմեանց բառերով և արարքներով:

Չկայ զինաթափում առանց քաջութեան, չկայ օգնութիւն, եթէ անհատոյց չէ, չկայ ներում առանց ճշմարտութեան

Հաւատացեալները չեն կարող բռնութեան դէմ պայքարել զէնքի ուժով, որը միայն նոր բռնութիւն է առաջացնում՝ անվերջ ոխակալութեան և վրէժխնդրութեան պարոյրով: Միւս կողմից, այս օրերին ձեր խօսքը կարող է օգտաւէտ լինել. «Մենք չենք սպանի ինքներս մեզ, մենք կօգնենք միմեանց, մենք կներենք միմեանց»: Սրանք հեշտ պարտաւորութիւններ չեն՝ չկայ զինաթափում առանց քաջութեան, չկայ օգնութիւն, եթէ անհատոյց չէ, չկայ ներում առանց ճշմարտութեան, բայց և որոնք խաղաղութեան միակ հնարաւոր ճանապարհն են: Այո, քանի որ խաղաղութեան ճանապարհը ոչ թէ զէնքի, այլ արդարութեան մէջ է: Եւ մենք ՝ կրօնական առաջնորդներս, առաջինն ենք, որ պէտք է աջակցէք այդ գործընթացներին՝ վկայելով, որ չարիքի դէմ պայքարելու կարողութիւնը ոչ թէ յայտարարութիւնների, այլ աղօթքի, ոչ թէ վրէժխնդրութեան, այլ՝ ներդաշնակութեան, ոչ թէ ուժի կիրառմամբ թելադրուած ամենակարճ ուղիների, այլ՝ համերաշխութեան համբերատար և կառուցողական ուժի մէջ է: Որովհետև միայն դա է իսկապէս արժանի մարդուն: Եւ քանի որ Աստուած պատերազմի Աստուած չէ, այլ խաղաղութեան:

Չմնալ անտարբեր, չլինել չէզոք, այլ՝ համախմբուած խաղաղութեան համար

Սրբազան Քահանայապետը ընդգծել է, որ այսօրեայ միջազգային թատերաբեմում խաղաղութիւնն է առանցքային բառը: Բառ, որի դիմաց չպէտք է անտարբեր կամ չէզոք լինել. «Ոչ թէ չէզոք, այլ խաղաղութեան համար համախմբուած: Ուստի, մենք վկայակոչում ենք ius pacis-ը՝ որպէս բոլորի՝ առանց բռնութեան հակամարտութիւնները կարգաւորելու իրաւունք»:

Ֆրանչիսկոսը, բացի այդ, յոյս է յայտնել, որ G20-ի օրակարգը հեռանկարում կներառի նաև կլիմայի և գաղթականութեան վերաբերեալ հարցերը, աւելացնելով, որ ոչ թէ մէկը միւսի դէմ դաշինքների, այլ՝ բոլորի խնդիրների լուծումների ընդհանուր որոնման ժամանակն է: «Երիտասարդ սերունդը ու պատմութիւնը մեզ կդատեն դրա համար», զգուշացրել է Պապը: